Ozon satýshylarǵa taýarlaryn Almaty men Astanadaǵy qoımalarda saqtaýdy usyndy
ASTANA. KAZINFORM — Ozon marketpleısi satýshylarǵa taýarlaryn Almaty men Astanadaǵy qoımalaryna ornalastyrýdy usyndy. Kompanııa Reseıdegi satyp alýshylarǵa tapsyrystardy Qazaqstan qalalarynan jetkizýge nıetti.
Bul týraly marketpleıs Telegram-arnasynda habarlady.
— Satýshylardy taýarlaryn Almaty men Astanadaǵy nysandarymyzǵa ornalastyrýǵa shaqyramyz. Ol jerden Reseıdegi tutynýshylarǵa tapsyrystardy esh qıyndyqsyz jetkizemiz. Sonymen qatar, Ozon-nyń jergilikti satyp alýshylary úshin jetkizý merzimi jyldamdap, Qazaqstan men Qyrǵyzstandaǵy satylymdar da ósedi, — delingen habarlamada.
30 qyrkúıekke deıin Ozon Almaty men Astanaǵa taýar jetkizý úshin jeke tasymaldaý aqysyn almaıdy.
Odan bólek, kompanııa jetkiziletin taýar kólemine shekteý qoıylmaıtynyn málimdedi. Demek, satýshylar Qazaqstandaǵy logıstıkalyq ortalyqtarda qalaǵan kólemde taýar saqtaı alady. Qoımalar Reseı men Qazaqstandaǵy satyp alýshylarǵa jetkizýge bolatyn iri gabarıtti taýarlardy da qabyldaıdy.
Almaty men Astanaǵa taýar jetkizý úshin qosymsha qujattar qajet emes. Satýshylar jetkizýge ótinimdi ádettegi tártippen rásimdep, Qazaqstandaǵy tıisti klasterlerdi tańdaýy kerek.
Eske salaıyq, bıyl tamyz aıynyń sońynda drondar Reseıdiń birqatar óńirindegi Ozon-nyń logıstıkalyq nysandaryna shabýyl jasaǵan bolatyn. Keıbir obektilerde órt shyqty.
Aıta keteıik, buǵan deıin Ozon qosymshasy Google Play júıesinen joǵalyp ketkenin jazǵanbyz.
Sonymen birge, Wildberries qoıma keshenin kóshirýge baılanysty mınıstrlik málimdeme jasaǵan edi.
