Ozon qosymshasy Google Play júıesinen joǵalyp ketti
ASTANA.KAZINFORM — Marketpleıs ıesi kompanııanyń habarlaýynsha, Android qurylǵylaryna arnalǵan Ozon, Ozon Fresh, Ozon Seller, Ozon Job jáne Ozon Travel qosymshalary Google Play dúkeninen joǵalyp ketken. Olardyń ne sebepti óshirilgeni ázirge belgisiz. Bul týraly DW jazdy.
Kompanııa Ozon Google Play erejelerin buzbaǵanyn jáne atalǵan qosymshalardyń eshqaısysy sanktsııaǵa ilinbegenin atap ótti. Qazirgi ýaqytta bul qosymshalar Apple App Store men Huawei AppGallery dúkenderinde áli de qoljetimdi.
Buǵan deıin Google Play dúkeninen Ozon Banktiń qosymshasy da alynyp tastalǵan bolatyn. Ozon Banki Eýropalyq Odaqtyń sanktsııalar tizimine engizilgen.
Eske sala keteıik, 2023 jyldyń sońyndaǵy jaǵdaı boıynsha Ozon alańynda – 45 400, Vaıldberrız alańynda – 55 704 qazaqstandyq satýshy tirkelgen.
