Ózindik ereksheligi bar taýarlardy ákelý úshin lıtsenzııa qajet - MKK
ASTANA. KAZINFORM – Qazaqstanda ózindik ereksheligi bar taýarlardy — qosarly jáne áskerı maqsattaǵy ónimder, sondaı-aq ulttyq qaýipsizdik sheńberinde baqylanatyn taýarlardy — kedennen ótkizý úshin lıtsenzııa alý mindetti. Bul týraly Qarjy mınıstrligi Memlekettik kirister komıtetiniń bas sarapshysy Zamıra Maldybaeva áleýmettik jelidegi tikeleı efırde habarlady.
Onyń aıtýynsha, taýardyń ózindik ereksheligi bar túrine jatatynyn tekserý úshin onyń SEQ TN kody qoldanylady. Bul kod kedende taýardyń tıisti sanatqa jatatynyn anyqtaýǵa múmkindik beredi.
QR Ónerkásip jáne qurylys mınıstrligi ózindik ereksheligi bar taýarlardy lıtsenzııalaý jáne sáıkestendirý salasynda ýákiletti organ. Ol eksportqa, ımportqa jáne tranzıtke lıtsenzııalar men ruqsattar beredi, sondaı-aq taýarlardy arnaıy sanatqa jatqyzý nemese jatqyzbaý týraly qorytyndy shyǵarady.
— Turaqty túrde taýar tasymaldaıtyn brokerler men kedendik ókilder lıtsenzııanyń daıyn ekenine kóz jetkizip, ruqsat qujattaryn aldyn ala rásimdeýi kerek. № 424 buıryqta taýarlardyń qandaı ruqsat qujattaryna jatatyny kórsetilgen, — dedi Zamıra Maldybaeva.
Lıtsenzııa men qorytyndy alý memlekettik qyzmet retinde júzege asady. Ótinishti e-License nemese eGov portaldary arqyly tapsyryp, qajetti qujattardy tirkeý qajet.
Eske salsaq, bıyl keden zańnamasyn buzǵandarǵa 534 ákimshilik is qozǵalǵany týraly jazǵan edik.