Ózin-ózi jumyspen qamtyǵandarǵa jańa salyq engizile me — mınıstrlik jaýaby
ASTANA. KAZINFORM — Qazaqstanda ózin-ózi jumyspen qamtyǵandar úshin jeke salyq qarastyrylmaıdy, dep habarlaıdy QR Ulttyq ekonomıka mınıstrliginiń baspasóz qyzmeti.
BAQ-ta jarııalanǵan aqparatqa baılanysty QR Ulttyq ekonomıka mınıstrligi ózin-ózi jumyspen qamtyǵan azamattar úshin jeke tabys salyǵyn (JTS) engizý máselesi qazirgi ýaqytta qaralyp otyrmaǵanyn jetkizdi.
Búgin «Atameken» ulttyq kásipkerler palatasynyń alańynda salyq zańnamasyn jetildirýdi talqylaý barysynda qatysýshylar ózin-ózi jumyspen qamtý ınstıtýtyn odan ári damytýdyń túrli tásilin qarastyrǵan edi. Pikir almasý kezinde retteýdiń keıbir yqtımal nusqalary týraly da aıtylǵan. Biraq bul másele aldaǵy kezeńniń enshisindegi saraptamalyq pikirtalastyń taqyryby ǵana bolýy múmkin.
— Al búgingi tańda ózin-ózi jumyspen qamtyǵandar úshin JTS engizý boıynsha eshqandaı sheshim qabyldanǵan joq. Bul aldaǵy kezeńniń de kún tártibinde turǵan másele emes. Jańa Salyq kodeksiniń sheńberinde ózin-ózi jumyspen qamtyǵandar úshin tek áleýmettik tólem tóleý kózdelgen, barlyǵy 4% (tabys aıyna 300 AEK-ten aspaıtyn jaǵdaıda, qyzmet jaldamaly jumyskerlerdi tartpaı júrgiziledi jáne ruqsat etilgen tizbege kiredi), — delingen habarlamada.
Eske salsaq, ózin-ózi jumyspen qamtyǵandardyń quqyqtyq mártebesi máselesi bıylǵy 21 shildede Premer-mınıstrdiń orynbasary — ulttyq ekonomıka mınıstri Serik Jumanǵarınniń tóraǵalyǵymen ótkizilgen jobalyq keńseniń otyrysynda qaralǵan bolatyn. Onyń qorytyndysynda Áleýmettik jáne Kásipkerlik kodeksterge ózgeristerdi aǵymdaǵy túzetýler paketine qospaý týraly sheshim qabyldandy.
Mınıstrliktiń málimetinshe, bul máseleni qaraýǵa jańa rejımdi qoldanýda jetkilikti tájirıbe jınaqtalyp, onyń jumys nátıjesi taldaǵannan keıin, kelesi jyly oralý josparlanyp otyr.
Osydan buryn Úkimette jumyssyzdar men NEET jastaryn jumyspen qamtý máselesi qaralǵanyn jazǵanbyz.
