Ózin qumar oıyndardan shekteýge ótinish bildirgen qazaqstandyqtar qatary kóbeıip keledi

ASTANA. KAZINFORM – Onlaın formattaǵy pılottyq joba qoldanysqa engizilgeli beri, ıaǵnı 8 aıǵa jýyq ýaqyt ishinde 168 myńnan astam adam ózin qumar oıyndardan shekteýge ótinish bildirgen.

«Bıylǵy 18 naýryzda eGov mobile platformasynda bastalǵan ózin qumar oıyndardan, bás tigýden shekteý boıynsha onlaın qyzmetti engizý jónindegi mınıstrliktiń pılottyq jobasy oń nátıje kórsetip, qumar oıyndarǵa qyzyǵýshylyqtyń tómendeýine yqpal etip keledi», – dep habarlaıdy Týrızm jáne sport mınıstrligi.

eGov mobile qoldanbasy arqyly – 168 250 adam ótinish tastasa, jazbasha túrde ótinish berýshiler sany – 2 311 adam. Oıyn bıznesin jáne lotereıany retteý komıtetiniń málimetine sáıkes, qumar oıyndardan ózin shektegender arasynda eń kóp úles 31-35 jas aralyǵyndaǵy azamattarǵa tıesili:

• eGov mobile arqyly – 40 212 adam (jalpy sannyń 23,90%)
• jazbasha – 836 adam (jalpy sannyń 36,17%).

Pılottyq jobany paıdalanýǵa engizgennen keıin bir aıdyń ishinde, ıaǵnı 18 sáýirge deıin eGov mobile arqyly 35 342 adamnan ótinish berilse, 15 qarashaǵa deıin berilgen ótinishterdiń sany - 168 250.

Sonymen qatar azamattardyń qaǵaz júzinde ózin-ózi shekteýge ótinish berýden mobıldi qosymsha arqyly onlaın ótinish berýge birtindep kóshýi baıqalyp otyr.

                                                                                                                                                                                                                      Dına Ǵalymjanqyzy