Ózin blogermin dep tanystyrǵan aqtóbelik birneshe adamdy aldap soqty
AQTÓBE. KAZINFORM — Ol jumysqa ornalastyrýǵa, júrgizýshi kýáligin alyp berýge jáne memlekettik satyp alý kezinde jeńip shyǵýǵa ýáde etken. Shyǵyn 10 mln teńgeden asty.
Aqtóbe oblysy Muǵaljar aýdanynyń 35 jastaǵy turǵyny ustaldy. Aýdannyń birneshe turǵyny aldanyp qalyp, aryz túsirgen.
— Ózin bloger retinde tanystyrǵan turǵyn 2024 jyldyń sońynda tórt adamdy aldap, aqshasyn ıemdenip alǵan. Kúdikti jábirlenýshilerdiń birine balabaqshaǵa jumysqa ornalastyrýdy, ekinshisine júrgizýshi kýáligin alýǵa járdemdesýdi, sondaı-aq tenderdi «jeńip berýdi» ýáde etken. Tórt jábirlenýshige keltirgen jalpy shyǵyn 10 mln teńgeden asty. Atalǵan fakti boıynsha sotqa deıingi tergeý amaldary júrgizilip jatyr. Kúdikti ýaqytsha ustaý ızolıatoryna qamaldy. Osy azamattyń zańsyz áreketinen zardap shekken adamdar Muǵaljar aýdandyq polıtsııa bólimine habarlasa alady, — dep habarlady oblystyq PD baspasóz qyzmeti.
Muǵaljar aýdanynyń ákimi Darhan Ermaǵambetov ustalǵan kúdiktiniń bıyl naýryz aıynda ǵana qoǵamdyq keńeske múshe bolǵanyn rastady.
Eske salsaq, Aqtóbede kásipkerdi bopsalaǵan kúdikti ustaldy. Kúdikti 7 mln teńge surap, 2 mln teńge alyp jatqan jerinen qolǵa tústi. Ol buryn sottalǵan adam bolyp shyqty.