Ózin áskerı komıssarıat qyzmetkeri retinde tanystyrǵan astanalyq 10 táýlikke qamaldy
ASTANA. KAZINFORM – Astanada ózin áskerı komıssarıat qyzmetkeri retinde tanystyryp, áleýmettik eksperıment júrgizgen azamat ákimshilik jaýapkershilikke tartyldy.
Astanalyq sottyń málimetinshe, azamat Á.-ge qatysty usaq buzaqylyq deregi boıynsha ákimshilik is qaraldy.
Oqıǵa Astana qalasyndaǵy Esil ózeniniń jaǵalaýynda bolǵan. Er adam qoǵamdyq orynda ózin áskerı komıssarıat qyzmetkeri retinde tanystyryp, jas jigittiń ómirine qaýip tóndiretin áreketter jasaǵan. Keıin oqıǵanyń vıdeosy Instagram áleýmettik jelisinde jarııalandy.
– Sot talqylaýy barysynda azamattyń kinási ákimshilik quqyq buzýshylyq týraly hattamamen, óziniń kinásin moıyndaǵan túsiniktemesimen, polıtsııa qyzmetkeriniń baıanatymen, ınternet jelisinde jarııalanǵan beınejazbamen jáne is materıaldarymen tolyq dáleldendi, – delingen sot habarlamasynda.
ÁQBtK-niń 434-baby 1-bóligi boıynsha 20 AEK mólsherinde aıyppul salý, 20-dan 60 saǵatqa deıin qoǵamdyq jumystarǵa tartý nemese 5-ten 15 táýlikke deıin ákimshilik qamaqqa alý jazasy qarastyrylǵan.
Sot jaza taǵaıyndaý kezinde quqyq buzýshynyń kinásin tolyq moıyndaýyn jáne quqyq buzýshylyqty alǵash ret jasaǵanyn jeńildetetin mán-jaı retinde eskerdi. Aýyrlatatyn mán-jaılar anyqtalǵan joq.
Sonymen qatar sot árekettiń qoǵamdyq orynda jasalǵanyn, áleýmettik jelide taralǵanyn, áleýmettik eksperımentke kámeletke tolmaǵan adamnyń qatystyrylǵanyn jáne qatysýshylardyń ómiri men densaýlyǵyna qaýip tóngenin nazarǵa aldy.
Sot qaýlysymen azamat Á. kináli dep tanylyp, oǵan 10 táýlik merzimge ákimshilik qamaqqa alý jazasy taǵaıyndaldy.
Sot qaýlysy zańdy kúshine engen joq.
Aıta keteıik, Aqtóbede sarbazdyń qabyrǵasyn syndyrǵan áskerı qyzmetshi sottaldy.
