Ózimniń qateligimnen altynǵa qol jetkize almaı qaldym - Ábıba Ábýjaqynova
ASTANA. KAZINFORM – Keshe ǵana dzıýdodan Tashkent tórinde ótip jatqan Grand Slam týrnırinde alǵash ret el qorjynyna kúmis júlde syılaǵan Ábıba Ábýjaqynova jarystan keıingi áserimen bólisti.
Ulttyq qurmanyń kóshbasshysy, qarakóz qaryndasymyz Tashkentke altyn medal úshin barǵanyn, alaıda, maqsaty áli oryndalmaǵanyn jasyrmaı aıtty.
«Júldeniń jamany joq. Dese de, Tashkentke tek altyn medal alamyn degen josparmen kelgen bolatynmyn. Biraq, buıyrmady», - dep aǵynan jaryldy Ábýjaqynova.
Fınalda qarsylasyńdy utýǵa ne jetpeı qaldy degen saýalymyzǵa: «Ózim qatelikke boı aldyrdym. Tym asyǵyp kettim. Sál sabyrlyq tanytyp, asyqpaı kúreskende jeńip keter me edim. Negizi, altynǵa jetýge múmkindigim bar edi. Sol asyǵystyqtan utylyp qaldym. Men fınaldaǵy qarsylasymmen osymen ekinshi ret beldesip turmyn. Alǵashqy beldesýimizde jeńis meniń enshimde bolǵan. Bul joly ol esesin qaıtaryp, esepti teńestirip ketti. Endi, alda taǵy jolymyz túıisip jatsa, aıanyp qalmasym anyq», - deıdi balýan qyz.
Sonymen qatar balýan qyz KAZINFORM tilshisine bergen shaǵyn eksklıýzıv suhbatynda aldaǵy josparlarymen de bólisip, jankúıer bolyp jatqan barlyq otandastaryna alǵys aıtýdy da umytqan joq.
«Osy naýryzdyń 9 kúni Chehııaǵa 10 kúndik oqý-jattyǵý jıynyna attanamyz. Sol jıynnan keıin, araǵa bir apta salyp Antalııada ótetin Grand Slam týrnırine qatysamyn. Bul joly altynǵa ózimniń qateligimnen qol jetkize almadym. Antalııada bas júldeni jeńip alýǵa bar kúshimdi salatyn bolamyn. Meniń ár jarysymdy qadaǵalap, maǵan jankúıer bolyp jatqan barlyq otandastaryma alǵysym sheksiz. Aqparattyq qoldaý kórsetip, bizdiń ár jetistigimizdi jalpaq jurtqa jarııalap jatqan sizderge de rahmet», - dedi Tashkentte ótip jatqan Grand Slam týrnıriniń kúmis júldegeri Ábıba Ábýjaqynova.
