Ózime muz jáne jyldamdyq óte unaıdy – Abzal Ájiǵalıev

ASTANA. KAZINFORM – Short-trekten Qazaqstan ulttyq quramasy jańa maýsymdy Kanadanyń Monreal qalasynda bastap, álemdik týrdyń (álem kýbogy qazir solaı atalady) alǵashqy kezeńinde óner kórsetti. Álemdik týrdyń ekinshi kezeńi 1-3 qarasha aralyǵynda AQSh-tyń Solt-Leık-Sıtı qalasynda ótedi. Ulttyq qurama kóshbasshylarynyń biri Abzal Ájiǵalıev úshin bul qalanyń orny erekshe. Óıtkeni 2016 jyly Abzal qazaqstandyqtar arasynan alǵash ret álem kýbogy kezeńiniń jeńimpazy atanǵan edi. Kazinform tilshisi bıyl úlken sportqa qaıta oralǵan shorttrekshimen habarlasyp, birneshe saýal qoıǵan edi.

- Abzal, Batys Qazaqstan oblysynda týyp-ósip, qazirgi kezde Astana qalasy atynan óner kórsetip júrsiń. Osy short-trek sportyna qalaı keldiń, aldymen soǵan toqtalsań?

- Birneshe sport túrinde baǵymdy synap kórdim. Biraq sońynda short-trekti tańdadym. Óıtkeni ózime muz jáne jyldamdyq óte unaıdy. Ol kezde tanymal emes sport túri bolǵan soń, short-trekke qatty qyzyqtym. Alǵashqy jattyǵýdan keıin-aq osy sporttan jaqsy nátıje shyǵady degen senim boldy.

- Iá, ol senim aqtaldy. Kezinde ulttyq qurama tizginin ustaǵan Qazaqstannyń eńbek sińirgen jattyqtyrýshysy Mádiǵalı Qarsybekovtiń talantty shákirtteriniń birisiń? Qazir ulttyq quramada jaǵdaı qalaı, kimniń qolastynda jattyǵýdasyń?

- Buǵan deıin AQSh jáne Nıderland quramalarynda bapker bolǵan. Sheteldik mamannyń da jattyqtyrýy óz jemisin beredi dep oılaımyn. Óıtkeni quramada tisqaqqan sportshylarmen qatar jastar da barshylyq.

- Bıyl úlken sportqa qaıta oralyp, Qazaqstan chempıonatynda tabysty óner kórsetip, ulttyq quramaǵa qosyldyń. Nelikten úzilis boldy?

- Iá, 1,5 jyl úzilisten keıin sportqa oraldym. Sebebi Koreıa elinde olımpıada chempıondarymen birge jattyǵý jasap, tájirıbe almastym. Bul ýaqytym da tekke ketken joq dep esepteımin.

- 2016 jyly álem kýbogy kezeńiniń jeńimpazy atandyń. Odan keıin de biraz bıikti baǵyndyrdyń. Endi sondaı nátıjege álem chempıonatynda qol jetkizýge múmkindik bolady ma?

- Árıne, bolady. Sol maqsatyma jetpeı, sportty qoımaımyn. Aldaǵy jyly naýryzda Beıjińde álem chempıonaty ótedi. Sol biz úshin basty jarystardyń biri bolmaq.

- Osyǵan deıin úsh olımpıada oıyndaryna qatystyń. Ásirese, Sochıde estafetada medalǵa jaqyn boldyńdar. 2022 jyly Beıjińde tórtinshi orynǵa taban tirediń. Eki jyldan keıin olımpıadada baq synaısyń ba?

- Olımpıada oıyndarynda oryn alý – bala kezden bergi armanym. Buıyrsa, sol maqsatyma jetsem deımin.

- Jańa maýsymda qandaı maqsat kózdep otyrsyń?

- Jańa maýsymda sheberligimizdi shyńdaı otyryp, tórt jylda bir ret ótetin Azııa oıyndarynda júldegerler qatarynan kórinýdi meje etip qoıdym. Azııa oıyndary sońǵy ret 2017 jyly Japonııanyń Sapporo qalasynda ótkeni málim. Endi 2025 jyly Qytaıdyń Harbın qalasynda bolmaqshy. Osyndaı aıtýly dodalarda el namysyn abyroımen qorǵaı bilsek, odan asqan baqyt joq.

- Áńgimeńe rahmet. Aldaǵy jarystarda tabys tileımin.