Ózimdi batyr sezinbeımin – Musa Ábdiraıym áýejaıdaǵy oqıǵa týraly

ALMATY. KAZINFORM - Búgin Almatyda er adam áýejaı qyzmetkerin kepilge alyp, pyshaq kezendi.

Oqıǵa 11:45-te boldy. Qyzdy qutqarý úshin 52 jastaǵy Musa Ábdiraıym kúdiktige ózin kepilge usynyp, qyzmetkerdiń ornyna turǵan. Er adam tártip saqshylarymen kelissózge alańdaǵan tusta ol kúdiktiniń qolyndaǵy pyshaqty julyp aldy. 

Erligimen eldi tánti etken azamatpen Kazinform tilshisi sóılesti. Ol áýejaıǵa Qazaqstanǵa áıgili kvartetti shyǵaryp salýǵa kelgen.

— Áýejaıǵa Qostanaıdaǵy kontsertke bara jatqan «Jigitter tobyn» shyǵaryp salýǵa kelgenmin. Bir kezde aıqaý-shý estildi. Barsam, qyzdy er adam pyshaqpen ustap alǵan. Ol polıtsııany janyna jaqyndatpaı tur. «Kelseńder, pyshaq suǵam» dep qorytty. Sony kórip oǵan: «qyzdyń ornyna meni kepilge al» dedim. Bir jaqsysy, ol aıtqanyma kóndi. Sóıtip qyzdyń ornyna turyp, bir alańdaǵan sátinde qolynan pyshaqty julyp aldym, - dedi ol. 

5 balanyń ákesi mundaı áreketke ne ıtermelegenin de túsindirdi. Aıtýynsha, sol sátte onda eshqandaı qorqynysh sezimi bolmaǵan, tek áýejaı qyzmetkerin qutqarýdy oılaǵan. 

— Kepilde bolǵan qyzdyń ornynda meniń qyzym da bolýy múmkin edi. Sondyqtan tek qutqarýdy oıladym. Sebebi bir artyq qımyl bolsa, qyzǵa pyshaq tyǵyp alatyndaı boldy. Ózimdi batyr sezinbeımin. Al, qandaı da marapat bolsa, ol — halyqtyń yqylasy. Biraq meniń oıym adamdy qutqarý boldy, - dedi ol. 

Eske salaıyq, buǵan deıin er adam Almaty áýejaıynda qyzdy kepilge alyp, kópshilik aldynda pyshaq kezengenin jazǵanbyz. 

Prezıdent áýejaıda qylmyskerdi ustaýǵa kómektesken azamatty memlekettik nagradaǵa usynýdy tapsyrdy.