Ózimdi aqtaǵym kelmeıdi: Akter Shárip Serik málimdeme jasady
ALMATY. KAZINFORM — Súıiktisin urdy dep aıyptalǵan qazaqstandyq akter Shárip Serik jasaǵan áreketi úshin keshirim surady.
Akter óziniń vıdeo úndeýin nstagram-daǵy paraqshasynda jarııalady.
— Men zorlyq-zombylyqqa qarsymyn. Ókinishke qaraı, meniń Álııa Býteevany lıftiden dóreki túrde súırep shyǵarǵan vıdeony kórdińizder. Ózimdi aqtaǵym kelmeıdi. Men qatelikke boı aldyrdym jáne zań aldynda jaýap berýge daıynmyn. Kópshiligińiz ursysyp qalǵan kezinde qatty ashýlanǵan bolarsyzdar. Biraq men sizderden ótinip surarym — meniń qateligimdi qaıtalamańyzdar, eshqashan qol kótermeńizder. Men Álııany betinen shapalaqpen urdym. Osy áreketim úshin odan, onyń otbasynan keshirim suraımyn, — dedi ol.
Osyǵan deıin Almaty turǵyny Álııa Bóteeva áleýmettik jelide akter Shárip Seriktiń qol kótergenin aıtyp, dálel retinde vıdeo men sýretter jarııalaǵan bolatyn.
Almaty Polıtsııasy atalǵan derekke qatysty tekseris júrgizip jatyr.