«Ózińnen basta, sheneýnik!» aktsııasy sheńberinde memlekettik bıýdjet 1,5 mln astam teńgege tolyqty

Sondaı-aq Astananyń bir memlekettik qyzmetshisi ákimshilik jaýapkershilikke tartyldy. Bul týraly Astana qalasy prokýratýrasynyń baspasóz qyzmetinen habarlandy.

Toqtala ketetin jaıt, ótken jarty jylda elordada 68 326 adam ákimshilik jaýapkershilikke tartylyp, olarǵa 1 360 064 466 teńge somasynda aıyppul salynǵan, onyń tek 470 396 874 teńgesi nemese 34,5 paıyzy ǵana óndirilgen. Bul rette Astana qalasynyń prokýratýrasy ákimshilik aıyppuldardy tólemeı júrgenderdiń «portretin» anyqtaý barysynda ákimshilik jaýapkershilikke tartylǵan jáne aıyppul tóleýden jaltaryp júrgenderdiń 2 000-y memlekettik qyzmetshi ekeni belgili boldy. Al atalǵan aktsııa sheńberinde birqatar memlekettik mekemelerdiń basshylaryna zań buzýshylyqty joıý týraly usynys engizilip, vedomstvolardyń memlekettik qyzmetshilerimen bereshekterin óz erikterimen óteý týraly quqyq túsindirý jumystary júrgizilgen. Birlesken is-sharalar júrgizý josparyna sáıkes sot oryndaýshylarynyń, jol polıtsııasy qyzmetkerleriniń, ýchaskelik ınspektorlar, salyq qyzmeti, ádilet organdary men basqa da múddeli organdar qyzmetkerleriniń qatysýymen astananyń memlekettik mekemelerinde reıdter ótti.