Óziniń ýaqytyn baǵalaıtyn árbir qazaqstandyqtyń elektrondy sandyq qoltańbasy bolýy kerek - Asqar Jumaǵalıev
ALMATY. 19 qarasha. QazAqparat /Erbol Azanbek/ - Elimizde sandyq qoltańba berile bastady. Búgin Almatydaǵy "Mega Almaty" OSO-da «NON-STOP ESQ» aktsııasy ótkizilip, qazaqstandyqtardy jappaı sandyq elektrondy qoltańba alýǵa shaqyrdy.
Sharanyń bastalýyn QR Baılanys jáne aqparat mınıstri Asqar Jumaǵalıev beınebaılanys arqyly resmı túrde jarııalady.
Onyń aıtýynsha, sharanyń basty maqsaty - elektrondy úkimettiń ınteraktıvti qyzmetin nasıhattaý. "Búginde elektrondy úkimettiń portaly arqyly 60 túrli ınteraktıvti jáne 1 myńnan astam aqparattyq qyzmetter usynylǵan. Bul qyzmet qazir turǵyndar tarapynan qyzý suranysqa ıe. Buǵan deıin 1 mıllıonnan astam anyqtamalar berildi. Meniń oıymsha, bul bolashaqta ósedi. Qazirgi tańda elimizdiń 230 myń turǵyny elektrondy sandyq qoltańbany alyp ta úlgerdi. Óziniń ýaqytyn baǵalaıtyn árbir qazaqstandyqtyń elektrondy tsıfrlyq qoltańbasy bolýy kerek. Óıtkeni, elektrondy sandyq qoltańba ınternet arqyly memlekettik qyzmet túrlerin qaýipsiz paıdalanýǵa múmkindik beredi ",- dep atap ótti mınıstr.
Esterińizge sala keteıik, aktsııaǵa tilek bildirýshi kez kelgen qazaqstandyq qatysa alady. Búginnen bastap 16 jeltoqsanǵa deıin «Mega-Almaty» jáne «Mega-Astana» saýda oıyn-saýyq ortalyqtarynda arnaıy operatorlar qyzmet kórsetedi. Bunda árbir qazaqstandyq tólqujatyn alyp kelip, bes mınýttyń ishinde elektrondy tsıfrlyq qoltańba ala alady.
