Óziniń orynbasaryn urlap, óltirdi degen aıyppen «Alash» JAQ prezıdenti ustaldy
ASTANA. Qazannyń 26-sy. QazAqparat /Gúlmıra Álıakparova/ - Adamdy urlaý jáne óltirý faktisi boıynsha «Alash» jabyq aktsıonerlik qoǵamynyń burynǵy prezıdenti ustaldy.
Bul týraly búgin jýrnalısterge arnalǵan brıfıngte QR ІІM Til saıasaty jáne aqparat departamentiniń bastyǵy Qýanyshbek Jumanov aıtty, dep habarlaıdy QazAqparat.
Q.Jumanovtyń sózine qaraǵanda, «Alash» JAQ pen «Alash-Banktyń» aktsııalaryn berýden bas tartqany úshin 2003 jyly atalmysh JAQ-tyń vıtse-prezıdenti Bolat Safındi urlap áketý jáne óltirý faktisi oryn aldy. Qylmystyq isti tergeý barysynda kúdiktiler anyqtaldy. Olar - JAQ-tyń prezıdenti Temirhan Muhambedııarov, onyń jeke qorǵaýshysy ári júrgizýshisi Dosaev, «Alash» JAQ pen «Alash-Banktyń» bas dırektorynyń orynbasary Ermanov jáne «Alash-servıs» JShS bas dırektorynyń orynbasary Babaevtar.
«Ótken senbi kúni Almatynyń krımınaldyq polıtsııa qyzmetkerleri «Alash» jabyq aktsıonerlik qoǵamynyń prezıdenti bolyp jumys istegen Temirhan Muhambedııarovty ustady. Ermanov 13 jylǵa bas bostandyǵynan aıyrylyp, jazasyn óteýde. 2007 jyly polıtsııa qolyna Babaev ta túsken bolatyn. Qazir sońǵy qylmysker Dosaevty izdep-tabý boıynsha shuǵyl-izdestirý sharalary júrgizilip jatyr», dedi ol.
