Óziniń basyna oq atqan Ulttyq qaýipsizdik komıtetiniń qyzmetkeri esin jıyp keledi
ASTANA. QazAqparat - Aqtóbede Ulttyq qaýipsizdik komıteti áskerı polıtsııasy kapıtanynyń densaýlyq jaǵdaıy aýyr kúıinde qalýda, biraq ol esin jıyp keledi, dep jazady diapazon.kz.
8 aqpan kúni Jedel medıtsınalyq járdem aýrýhanasyna basyna jáne betine tıgen oq jaraqatymen UQK áskerı polıtsııasynyń qyzmetkeri jetkizildi. Dárigerlerdiń aıtýynsha, oq mańdaı súıeginen shyqqan. Mıǵa zaqym kelgen. Operatsııa 7 saǵatqa sozyldy, eki hırýrgııalyq brıgada jumys istedi.
Emdeý jumystary jónindegi bas dárigerdiń orynbasary Marat Janqulov osy ýaqytta jansaqtaý bóliminde jatqan áskerı polıtsııa kapıtanynyń densaýlyq jaǵdaıy týraly aıtyp berdi.
«Qazir onyń jaǵdaıy aýyr, biraq, qan qysymy bir qalypta. Ne degenmen, óte aýyr jaraqat. Jaǵdaıy jaqsaryp kele jatqandyǵy týraly aıtý áli erte. Sebebi emdik protsedýralar arqasyndaǵy aldamshy jaqsarýlar bolýy múmkin. Naqty aıtý úshin kem degende taǵy 10 kún kerek. Qazir onyń jaǵdaıy aýyr, biraq birte-birte esin jınap keledi. Suraqtar men dárigerdiń nusqaýlyqtaryna bas ızep jaýap beredi», - dedi ol.
Aldyn ala málimet boıynsha, 32 jastaǵy áskerı polıtsııa kapıtany 2030 áskerı bóliminde atý jattyǵýlaryna josparly daıyndyq kezinde tapanshadan óziniń basyna oq atqan.
