Ózińe sen: Oqý-aǵartý mınıstri aqsaılyq 1-synyp oqýshysyna hat joldady
BQO bilim basqarmasynan málim etkendeı, buǵan deıin áleýmettik jelide Tımýr túsken beınejazba keńinen taraǵan edi.
Onda oqýshy anasyna úı tapsyrmasyn úlken ájesimen birge oryndaǵandy jón kóretinin aıtady. Anasy buǵan kúlip, óz ájesiniń tek 3-synypty bitirgenin jetkizedi.
Anasynyń ájesiniń mundaı bilim alǵanyna tańdanǵan bala qyzyqty suraqtar qoıady.
Osy beınejazbany kórgen Oqý-aǵartý mınıstri oqýshyǵa arnaıy hat joldaǵan.
«Anańmen birge úı tapsyrmasyn oryndap otyrǵan vıdeony kórdim. Eki ájeńnen de qatar tárbıe alý – ol úlken baqyt.
Buryn bizdiń ata-ájelerimizdiń qazir beriletindeı bilimdi alýǵa múmkindikteri bolmady. Alaıda sol kezdegi qıyn jaǵdaıǵa qaramastan, ata-ájelerimiz ata-analarymyzǵa durys tárbıe berý úshin baryn salyp, Qazaqstannyń damýyna óz úlesterin qosty.
Qazirgi oqýshylardyń oqýǵa jáne elimizdiń damýyna kóbirek úles qosýǵa múmkindikteri bar. Al jaqsy oqyp, eńbektengen adam ómirde úlken jetistikke jetedi.
Oqýshylarymyzdyń halyqaralyq jarystarda jeńiske jetip, jańa rekordtar ornatyp jatqany týraly jańalyqtar qazirdiń ózinde úırenshikti nársege aınalyp úlgerdi. Al balalar jetistikteri úshin bilim granttary men aqshalaı syılyqtar alady. Meniń oıymsha, bul balalarǵa ynta-jiger beredi.
Eger sen jaqsy oqyp, úlkenderdi syılasań jáne anańnyń aıtqanyn tyńdap, sabaqty jaqsy oryndasań, onda seniń jetistikteriń men jeńisteriń jaıynda áli talaı ret estıtinimizge senimdimin.
Árqashan izdenimpaz, eńbekqor bol, ózińe sen. Ustazdarǵa qurmetpen qarap, jaqyndaryńa qamqor bol.
Aldymyzda Jańa jyl kele jatyr. Osy meıramǵa oraı saǵan jańajyldyq syılyqtar jiberip otyrmyn. Saǵan myqty densaýlyq jáne tabys tileımin. Alǵa qoıǵan arman-maqsattaryń oryndala bersin!» dep jazdy mınıstr hatynda.
Tımýr Qunysovqa mınıstrdiń syılyǵy da tabys etildi. Buǵan erekshe qýanǵan bala Ashat Aımaǵambetovpen birge sýretke túsip, selfı jasaǵysy keletinin bildirdi.
Eske sala keteıik, budan buryn Batys Qazaqstan oblysynda 40 jańa mektep salynatynyn jazǵan bolatynbyz.
