Ózine-ózi qol salǵan Jampozovtyń isi qaıta qozǵaldy
ASTANA. QazAqparat - Ortalyq kommýnıkatsııalar qyzmetinde ótken baspasóz máslıhatynda Joǵary sot sýdıasy Erlan Rahymbekov polıtseı men prokýrorǵa oq atyp, ózine-ózi qol salǵan Jampozov týraly pikir bildirdi, dep habarlaıdy «QazAqparat» HAA tilshisi.
Onyń aıtýynsha, Jampozovtyń isi qaıta qozǵaldy.
«Qazirgi ýaqytta sot óndirisi qaıta jańartyldy jáne onyń jaqyn týystarynyń pikiri tyńdalyp, soǵan sáıkes sheshim qabyldanady. Barlyǵy onyń jaqyn týystaryna baılanysty», - dedi ol.
«Protsestiń ózine kelsek, qandaı úkim shyǵarylatynyn bilmeımiz, onyń aqtalýy da, aıyptalýy da múmkin, - dep jalǵastyrdy sýdıa. - Aldaǵy ýaqytta qarastyrý máselesin sheshý úshin qylmystyq is qaıta jańartyldy. Aıyp taǵylǵan kúnniń ózinde de, Jampozov qaza tapqandyqtan, is toqtatylýy múmkin».
Sonymen birge, Rahymbekov Jampozovtyń málimdemesine de qatysty sóz qozǵady.
«Marqumnyń málimdemesi týraly pikir aıtýǵa áli erte. Onyń beıneúndeýi boıynsha tekserý jumystary júrip jatyr. Bizge tekserý nátıjesin kútý kerek, sol kezde máseleniń mán-jaıy ashylatyn bolady», - dep atap ótti sýdıa.
Eske sala keteıik, shilde aıynda Ómirbek Jampozov Aqmola oblysy Tselınograd aýdany prokýratýrasynyń ǵımaraty janynda quqyq qorǵaý organdarynyń qyzmetkerlerine qarýly shabýyl jasap, keıin ózine-ózi qol jumsady. Atalǵan oqıǵadan soń jelide Jampozovtyń QR sot júıesin aıyptaǵan beıneúndeýi paıda boldy.
