Ózine qol jumsaý oqıǵasynyń eshqaısysy da UBT-men baılanysty emes - BǴM

Búgin QR Prezıdenti janyndaǵy Ortalyq kommýnıkatsııalar qyzmetinde ótken baspasóz máslıhatynda Bilim jáne ǵylym mınıstrliginiń Bilim berý men ǵylym salasyn qadaǵalaý komıtetiniń tóraǵasy Saıat Núsipov osyndaı pikir bildirdi.

Brıfıng barysynda jýrnalıster tarapynan sýıtsıdtiń UBT naýqanymen baılanystyratyn mysaldar týraly sóz bolyp, bıyl da birqatar óńirlerde oqýshylardyń óz-ózine qol salǵany aıtylǵan edi.

«Jastarymyz bolsyn, kim bolsyn mezgilsiz qaıtys bolyp, aıaq astynan ajal qushyp jatsa, bul qatardaǵy bizden bastap Úkimetimizge deıin aýyr tıedi. «Tas túsken jerine aýyr» deıdi. Bundaı oqýshylardyń ózine ózi qol salýy UBT kezeńimen tuspa tus kelip jatsa, oǵan UBT-ny kinálap jatsa, árıne bizge de jeńil emes. Alaıda, aıta keteıik, Qazaqstanda sýıtsıd azaıyp keledi, 2013 jyly - 290, byltyrǵy 2014 jyly - 190 adam ózine qol saldy. Bıyl odan da azaıdy. Sonymen qatar, bıyl jastar arasynda oryn alǵan ózine ózi qol salý oqıǵasynyń eshqaısysy da UBT-men baılanysty emes», - dep málimdedi komıtet tóraǵasy Saıat Núsipov.

Sonymen qatar, komıtet basshysy Ońtústik Qazaqstan oblysyndaǵy oqýshy qyzdyń sýıtsıdi týraly aıta kele, onyń UBT synaǵyn óte jaqsy tapsyrǵanyn, beınejazý taspalarynda oqýshynyń testileýden kóńildi shyqqany jazylǵanyn alǵa tartty.

«Ol qyzdy «grantqa óte almaı qol jumsady» dep aıtýǵa bolmaıdy. Óıtkeni, grant áli de ótken joq. Ol qyzdyń qaldyrǵan hatyn biz bilmeımiz. Sondyqtan da, bul ólimdi UBT-men baılanystyrǵan durys emes, ol dáleldengen de joq. Arnaıy organdar tekserý júrgizip jatyr, ata-analary da saraptamadan ótkizýden bas tartty. Bul - asa kúrdeli másele. Sol úshin aqparat quraldarynan osyndaı máselege abaı bolýdy surar edim. «Osylaı boldy» dep jaman nárseni aıta berýdiń ózi jaǵymsyz, ondaı aqparat jastar arasynda vırýs sekildi taraıdy. Sensatsııa qýalap, reıtıng úshin sondaı jaǵymsyz jańalyqtarǵa qushtar bolmasańyzdar der edim», - dedi Saıat Núsipov.