Ózińdi baqytty etýdiń amaldary da bar
ASTANA. QazAqparat - Maıo emhanasynyń dárigeri Amıt Soodtyń aıtýynsha, baqyt úshin aqsha, densaýlyq nemese tabys qajet emes. Baqytqa aparar jol - ǵalymdardyń 10 aptaǵa bólip, jasap shyǵarǵan tórt satyly baǵdarlama.
Amıt Sood baqyttyń 40-50 paıyzy adam jasaǵan tańdaýyna jáne neni kózdep turǵanyna baılanysty ekenine senimdi, dep baıandaıdy The Daily Mail.
Odan buryn ótkizilgen zertteýler adam mıy jaǵymsyzdyqty baıqaý úshin baǵdarlamalanyp qoıylǵanyn kórsetti. Qazirgi zamanǵy adamdardyń babalaryna tiri qalýǵa kómektesken osy. Amıt Soodtyń pikirinshe, ómirge kózqarasty ózgertý baqyt deńgeıin aıtarlyqtaı ósirýge septigin tıgize alady. Mamannyń baǵdarlamasy 4 satydan turady.
Birinshi qadam - oılardy qadaǵalap otyrýǵa kómektesetin jattyǵý. Ǵalym 5-3-2 tehnıkasyn qoldanýdy usynyp otyr. Uıqydan oıanǵan soń, birinshi kezekte ómirlerińizge mańyzdy oryn alatyn bes adam týraly oılaý kerek. Jaqyn adamdarmen kezdesýdiń alǵashqy úsh mınýtynda olardy kópten beri kórmegendeı amandasý qajet. Jáne adamdy kórgen sátte alǵashqy eki sekýndta oǵan oısha bar jaqsylyqty tileńiz. Ekinshi qadam - alǵys, raqymdylyq, qabyldaý jáne keshirý arqyly emotsııalyq turaqtylyqty damytý.
Úshinshi qadam - oqý, jattyǵý, mýzyka, óner, ǵıbadat etý, medıtatsııalaý jáne ıoganyń kómegimen sana men deneniń arasyndaǵy baılanysty nyǵaıtý. Tórtinshi qadam - salaýatty ómir salty jáne jaqsy ádetter, atap aıtqanda, fızıkalyq belsendilik pen durys tamaqtaný. Sondaı-aq Amıt Sood ómirge qarapaıym qaraýǵa keńes beredi. Maman baǵdarlamanyń nebári on aptasynyń ishinde oılaýdyń túbegeıli ózgere túsetinin aıtady.
