«Óziń úshin mańyzdy, eliń úshin mańyzdy!» - respýblıkalyq basylymdarǵa sholý

ASTANA. 6 qańtar. QazAqparat - Qazaq aqparat agenttigi respýblıkalyq basylymdarda 6 qańtar, juma kúni shyqqan ózekti materıaldarǵa sholýdy usynady.

***

«Keshe Qaırat Mámıdiń tóraǵalyq etýimen Parlament Senatynyń Bıýro otyrysy boldy», dep jazady «Egemen Qazaqstan» gazeti juma kúngi nómirindegi «Mindetter belgilendi» degen taqyryptaǵy aqparatynda. Otyrysty asha kelip, Senat Tóraǵasy Q.Mámı jańa jyl­daǵy de­pý­tat­tyq korpýstyń aldynda turǵan mindet­terdi belgiledi. «Parlament Senaty Memleket basshysynyń bastamalaryn zańnamalyq turǵyda sapaly qamtamasyz etý, memleket saıasatynyń basym baǵyttaryn quqyqtyq turǵyda qol­­daý boıynsha jumys isteýi tıis», - dep atap ótken Q.Mámı. Qazirgi kezde Senattyń qaramaǵynda 25 zań jobasy bar ekeni aıtyldy. Sondaı-aq bıylǵy naýryz aıynda Almatyda TMD Parlamentaralyq Assambleıasynyń mereı­toı­lyq otyrysy, al mamyrda Astanada Álemdik jáne dástúrli dinder lıderleriniń IV sezi bolatynyn habardar etti.

 

«Egemen Qazaqstan» gazetiniń jazýynsha, keshe Almaty qalasynda «Óziń úshin mańyzdy, eliń úshin mańyzdy!» atty  aktsııa ótti. Bul shara barysynda qala jastary Parlament  Májilisi men qalalyq máslıhatqa depýtattardy saılaý boıyn­sha paıdaly jáne mańyzdy aqparattar aldy. Іs-shara barysynda ártúrli baıqaýlar men tanymdyq vıktorınalar ótti. Aktsııanyń maqsaty qandaı da bir kandıdatqa daýys berý emes, kerisinshe, jastardyń arasynda elektoraldy saýattylyqty kóterý bolyp tabyldy. «Mundaı sharalar elimizdiń basqa da birqatar oblys ortalyqtarynda uıymdastyryldy. Máselen, keshe keshkisin Qostanaı qalasyndaǵy «Sfera» túngi klýbynda «Óziń úshin mańyzdy, eliń úshin mańyzdy!» degen qoǵam men jastar dıskotekasy bolyp ótti. Ony oblystyq «GrIn» Azamattyq alıansy Ortalyq saılaý komıssııasymen birlesip uıymdastyrdy», - dep jazady basylym.

***

«QR Bas prokýrory Ashat Daýylbaev Parlament Májilisi jáne máslıhattar depýtattarynyń kezekten tys saılaýyn ótkizý boıynsha TMD baıqaýshyla­ry­nyń mıssııasy shtabynyń basshysy Evgenıı Slobodamen kezdesti», - dep jazady «Kazahstanskaıa pravda» gazeti. Kezdesý barysynda Bas prokýror saılaý barysy zańdylyǵynyń jaı-kúıi týraly sholýdy usynyp, sondaı-aq prokýratýra organ­da­rynyń saılaý kezeńinde zańdy­lyq­tyń saq­talýyn qadaǵalaý boıynsha júrgizip jatqan jumys, onyń ishinde saılaý zańna­masynyń buzylýy týraly ótinishterdi qa­raý men olardy boldyrmaý boıynsha qolda­nyp otyrǵan sharalary týraly aqparat­tar­dy ortaǵa saldy.

***

«Ekibastuzda Qazaqstan globýsy paıda boldy», - dep jazady «Lıter» gazeti. Basqa globýstarǵa qaraǵanda Qostanaı oblysynda ornatylǵan bul óner týyndysynyń ereksheligi onda Qazaq eli barynsha úlken beınelengen. Atalǵan týyndynyń avtory ekibastuzdyq músinshi Ǵamal Saǵıdenov oǵan Beıbitshilik pen kelisim músini dep at qoıǵan.

***

«Karavan» gazetiniń jazýynsha, 12 qańtar kúni Almatyda kórnekti qoǵam jáne memleket qaıratkeri Dinmuhamed Qonaevtyń týǵanyna 100 jyl tolýyna oraı onyń turǵan páterinde murajaı ashylmaq. Murajaı Tólebaev kóshesindegi 119 úıdiń úsh bólmeli páterinde ornalasady. Bul jerde D.Qonaev jubaıy Zýhra Sháripovamen 1969 jyldan bastap 1993 jylǵa deıin turǵan bolatyn. Murajaıǵa kelýshiler  otbasy kollektsııasyndaǵy kóptegen syılyqtarmen, estelik zattarmen tanys bola alady. Tolyǵyraq basylymnyń búgingi sanynda «Kvartıra Kýnaeva - vhod razreshen» degen maqaladan oqyp bile alasyzdar.