Ózin polıtsııa qyzmetkerimin dep tanystyrǵan jas jigit aqtóbelik dúkenshilerdi aldap soqqan
AQTÓBE. QazAqparat - Aqtóbede 23 jastaǵy jigit ózin polıtsııa qyzmetkerimin dep tanystyryp, dúkenshilerdi aldap soqqan, dep habarlaıdy QazAqparat tilshisi.
Aqtóbelik turǵyn ishimdik satatyn dúkenderge baryp, olardyń lıtsenzııasyn teksermek bolǵan. Ózin polıtsııa qyzmetkerimin dep tanystyrǵan 23 jastaǵy jigit ákimshilik hattama toltyrmas úshin qyzmetine 30-60 myń teńge suraǵan.
«Aqtóbe qalasynyń ýchaskelik polıtsııa ınspektory 23 jastaǵy qala turǵynynyń qylmystyq áreketin anyqtap, ustady. Kúdikti ózin polıtsııa qyzmetkerimen dep tanystyryp, alkogoldik ishimdik satatyn dúken ıelerinen 30-60 myń teńge suraǵan. Ákimshilik jaýapkershilikten bosatýǵa ýáde bergen kúdikti eki dúken ıesin aldady. Ol buryn sottalmaǵan», - dedi Aqtóbe oblystyq ІІD baspasóz qyzmeti.
Aıta keteıik, osy oqıǵaǵa baılanysty Qylmystyq kodekstiń «alaıaqtyq» baby boıynsha is qozǵaldy. Tergeý júrip jatyr.
