Ózin polıtseı retinde tanystyryp, jurtty tonaǵan almatylyq ustaldy
Jetisý aýdandyq polıtsııa basqarmasynyń málimetinshe, 21 jastaǵy Ý. esimdi azamattyń is-áreketi Qylmystyq kodekstiń birneshe baby boıynsha saralanǵan.
«Jalǵa alynǵan kólikke mingen jas jigit kóshede jasóspirimderdi toqtatyp, zattaryn kórsetýdi talap etip, túrli syltaýlarmen uıaly telefon, aqsha jáne basqa da baǵaly zattardy alyp alǵan. Taǵy bir jaǵdaıda kúdikti shaǵyn dúkenderge baryp, azyq-túlik alyp, kelesi kúni aqshany ákelýge ýáde bergen. Jas jigit bir táýlikke páter jaldap, keıin sol páterdi tonap ketken», – deıdi Jetisý aýdandyq Polıtsııa basqarmasynyń bastyǵy Darhan Musanov.
Búgingi kúni onyń jeti alaıaqtyq, eki tonaý jáne bir páter urlyǵyna qatysy bar ekeni dáleldendi.
Jas jigit bul qylmystaryn moıyndady.
«Ustalǵan azamattyń buryn jasalǵan osyǵan uqsas qylmystarǵa qatysy bar-joǵyn anyqtaýǵa baǵyttalǵan birqatar jedel-izdestirý is-sharalary júrgizilýde. Tergeý barysynda oǵan qatysty qamaýǵa alý túrindegi bultartpaý sharasy tańdaldy»,- deıdi polıtsııa ókili.