Ózin-ózi jumyspen qamtyp júrgenderdi tirkeý qalaı júrgiziledi
ASTANA. QazAqparat - QR Eńbek jáne xalyqty áleýmettik qorǵaý mınıstri Mádına Ábilqasymova beıresmı jumyspen qamtylǵan azamattardy zańdastyrý joldary týraly aıtyp berdi, dep xabarlaıdy QazAqparat tilshisi.
Mınıstrdiń aıtýynsha, búginde tirkeýdi jeńil jáne yńǵaıly etý úshin barlyq jaǵdaı jasalǵan. Atap aıtqanda, elektrondy úkimet portaly, xalyqqa qyzmet kórsetý ortalyqtary men koll-ortalyqtar arqyly jumysty rásimdeý qyzmetteri engizildi. Al árbir óńirde tikeleı jeli ashyldy. Ol arqyly eńbek shartyn rásimdemeý, jumysqa májbúrleý, jalaqyny konvertpen berý jáne taǵy basqa faktiler jaıynda xabarlaýǵa bolady.
«Buryn azamattardyń mártebesin naqtylaý kezinde úı-úıdi aralap, bárin qolmen tirkep, aqparattyq júıege engizsek, qazirgi ýaqytta bunyń barlyǵyn egov.kz, halyqqa qyzmet kórsetý ortalyqtary, 1414 biryńǵaı baılanys ortalyǵy arqyly avtomatty túrde jasaýǵa múmkindik bar», - dedi M.Ábilqasymova Úkimettiń búgingi otyrysynda.
Onyń sózine qaraǵanda, búginde qosymsha ádis-tásilderdi engizý sharalary atqarylyp keledi.
«Ol jumys «Kúndelik» aqparattyq júıesi, medıtsınalyq mekemeler sheńberinde iske qosylady. Atalǵan mekemelerdiń qyzmetkerleri jeke sáıkestendirý nómirleri arqyly adamnyń naqty áleýmettik mártebesiz júrgenin xabarlaıdy. Sol kezde ony rásimdeıdi nemese egov.kz elektrondyq úkimet portalyna jiberedi», - dep atap kórsetti M.Ábilqasymova.
Aıta keteıik, búgin mınıstr Ábilqasymova ózin-ózi jumyspen qamtyp júrgenderdi zańdastyrý boıynsha esep berdi. Onyń aıtýynsha, jyldyń basynda 2,7 mıllıon adamnyń naqty áleýmettik mártebesi bolmaǵan.
«Búginde 1 mıllıon 385 myń adamnyń mártebesi naqtylandy. Olardyń ishinde 548 myń jumysker eńbek shartyn jasap, mindetti zeınetaqy jarnalary túse bastady. 13 myń kásipker óz qyzmetin resmı túrde tirkedi. 22 myńnan astam adam azamattyq-quqyqtyq sıpattaǵy shart boıynsha jumys isteıtinder, úı jumyskeri jáne sheteldik kásiporyndarda jumys isteıtinder retinde anyqtaldy. 17 myńnan astam adam jumyssyz retinde tirkeldi. 84 myń adam áleýmettik tólemderdi, al 19 myń adam ataýly áleýmettik kómekti alýshy retinde tirkeldi. 29 myń áıel júktilikke baılanysty esepke qoıyldy. 8,7 myń adam úsh jasqa deıingi balasyna kútim jasap otyr», - dedi M.Ábilqasymova Úkimettiń búgingi otyrysynda.
Budan bólek, 642,5 myń adam úı sharýasyndaǵy áıelder, stýdentter, tys jerlerge ketken adamdar 18 jastan asqan mektep oqýshylary retinde jáne basqa sanattar boıynsha naqtylandy. Sondaı-aq derekqorlarda qaıtalanatyn jeke sáıkestendirý nómirleri (JSN), merzimi ótip ketken qujattar anyqtalyp jańartyldy.
Mınıstrdiń aıtýynsha, Qazaqstanda ózin-ózi jumyspen qamtyp júrgenderdiń naqty sanattary engizildi.
