Ózin-ózi jumyspen qamtyǵandardyń eńbek ónimdiligi jaldamaly jumysshylarǵa qaraǵanda 6 ese tómen -G. Ábdiqalyqova
ASTANA. 16 mamyr. QazAqparat /Qanat Mámetqazyuly/ - Ózin-ózi jumyspen qamtyǵandardyń eńbek ónimdiligi jaldamaly jumysshylarǵa qaraǵanda 6 ese tómen.
Búgin QR Parlamentiniń Májilisinde «Jumyspen qamtý - 2020» baǵdarlamasy taqyrybynda ótip jatqan Úkimet saǵatynda Eńbek jáne halyqty áleýmettik qorǵaý mınıstri Gúlshara Ábdiqalyqova osylaı málim etti.
«Ózin-ózi jumyspen qamtyǵandardy turǵylyqty jeri boıynsha jiktesek, olardyń basym bóligi elimizdiń Ońtústik óńirinde jáne aýyldyq jerlerde ornalasqan. Atap aıtsaq, búgingi kúni aýyldyq jerlerdegi ózin-ózi jumyspen qamtyǵandardyń úlesi 71,2 paıyzdy qurasa, qaladaǵy osyndaı sanattaǵylardyń kórsetkishi 28,8 paıyz. Jalpy halyqtyń 33 paıyzyn quraıtyn osy sanattaǵylar respýblıkamyzdyń jalpy qosylǵan qunynyń shamamen 10 paıyzyn ǵana óndiredi. Sondaı-aq ózin-ózi jumyspen qamtyǵandardyń eńbek ónimdiligi jaldamaly jumysshylarǵa qaraǵanda 6 esege tómen»,-dedi mınıstri G. Ábdiqalyqova.
Al ózin-ózi jumyspen qamtyǵandardy bilim deńgeıi boıynsha jiktesek, onda qaladaǵy bul sanatqa jatatyndardyń 27 paıyzy joǵary bilimdi, 32 paıyzy orta arnaýly, al 41 paıyzy ortasha bilimdi bolyp tabylady. Sonymen birge aýyldaǵy ózin jumyspen qamtyǵandardyń 8,5 paıyzynda joǵary bilimi bolsa, 15 paıyzy ortasha arnaýly jáne 76 paıyzdan astamy orta bilimdi bolyp otyr.
