Ózin-ózi jumyspen qamtý: Qazaqstan men Polshany salystyrýǵa bola ma
ASTANA. QazAqparat - QR Eńbek jáne halyqty áleýmettik qorǵaý mınıstri Mádına Ábilqasymova ózin-ózi jumyspen qamtyǵan azamattarǵa qatysty jaǵdaı boıynsha túsinik berdi, dep habarlaıdy QazAqparat.
«Jumyspen qamtylǵan halyqtyń sany 2010 jyldan bastap 6 paıyzǵa ósip, 2017 jyldyń qorytyndysy boıynsha 8,6 mln adamdy qurady. Bul rette, jaldamaly jumyskerlerdiń sany 1 077 adamǵa ósip, 6,5 mln adamdy qurady. Al ózin-ózi jumyspen qamtyǵan halyqtyń sany 606 myń adamǵa qysqaryp, 2,1 mln boldy. Jalpy, sońǵy 10 jylda ózin-ózi jumyspen qamtyǵan halyqtyń sany 35-ten 24 paıyzǵa deıin tómendedi, ony Ońtústik Koreıa (25%) jáne Polsha (21%) sııaqty memlekettermen salystyrýǵa bolady», - dedi mınıstr Májilistegi jumyspen qamtý máselelerine arnalǵan parlamenttik tyńdaýda.
Sonymen qatar, beıresmı jumyspen qamtý kórsetkishi 37-den 16 paıyzǵa, ıaǵnı eki esege deıin qysqardy.
«Bul turǵyda ózin-ózi jumyspen qamtyǵan azamattar qatarynda jumys berýshiler jáne jeke kásipkerler retinde ónimdi jumyspen qamtylǵandardyń úlesi 1,5 mıllıonǵa ósti. Sonymen birge, jumyspen qamtý qurylymynda tómen ónimdilik saladan joǵary ónimdilik salaǵa jumyskerlerdiń aýysýymen baılanysty sapaly ózgerister boldy», - dep túsindirdi Ábilqasymova.
Belgili bolǵandaı, aýyl sharýashylyǵynda jumyspen qamtylǵandardyń sany 1,2 mln adamǵa deıin, shamamen eki esege qysqardy. Jumyskerler ónerkásiptiń óndirýshi salalaryna jáne qyzmet kórsetý salasyna aýysty. Jumyspen qamtý aqparattyq-kommýnıkatsııalyq tehnologııalarda - 52 paıyzǵa, týrızmde - 75 paıyzǵa, áleýmettik salada úshten bir bóliginen astam kórsetkishke ósti. Nátıjesinde, ekonomıkada eńbek ónimdiligi 2,2 esege joǵarylady.
