Ózin-ózi jumyspen qamtamasyz etip otyrǵan áıelderdiń naqty sanyn anyqtaıtyn baǵdarlama qajet - A.Samaqova
ASTANA. Jeltoqsannyń 11-i. QazAqparat /Aıdar Ospanalıev/ - Biz statıstıka organdarymen, Ekonomıka jáne bıýdjettik josparlaý mınıstrligimen birlese otyryp, ózin-ózi jumyspen qamtamasyz etip otyrǵan áıelderdiń naqty sanyn anyqtaıtyn baǵdarlama daıyndaımyz.
Búgin Astanada «Áıelderdiń qoǵamdaǵy saıası múmkindikteri - genderlik demokratııanyń ustanymdary, problemalar men perspektıva» atty taqyrypta ótken respýblıkalyq konferentsııa barysynda Májilis depýtaty Aıtkúl Samaqova osylaı aıtty, dep habarlaıdy QazAqparat.
Búginde elde ózin-ózi jumyspen qamtamasyz etip otyrǵan jáne eshqandaı statıstıkalyq málimetterde tirkelmegen áıelder sany óte kóp. Olar qoǵam ómirinen múldem oqshaýlanyp, salyq tóleý, medıtsınalyq qyzmet kórsetý sııaqty sharalardan tys qalǵan. «Men keshe ǵana Eńbek jáne halyqty áleýmettik qorǵaý mınıstri Gúlshara Ábdihalyqovamen kezdesip, atalmysh máseleni birlese otyryp taǵy bir pysyqtap shyqtyq. Biz qoǵamda mundaı problemanyń bar ekendigine naqty kóz jetkizdik», dedi halyq qalaýlysy.
