Ózin-ózi «urlaǵan» Ázerbaıjan azamaty ustaldy
ALMATY. QazAqparat – Almaty polıtsııasy ózin ózi «urlap» aqsha óndirmekke árekettengen Ázerbaıjan azamatyn ustady, dep habarlaıdy QazAqparat tilshisi.
37 jastaǵy Ázerbaıjan Respýblıkasynyń azamaty buǵan deıin Qazaqstanǵa birneshe ret kelgen. Sońǵy ret kelgende týystarymen alaıaqtyqqa barýǵa bel býǵan.
«Ol ózin elge jemis-jıdek pen kókónis jetkizýshisi retinde tanysyp júrgen. Nur-Sultan qalasynan seriktes tapqan. Ózin ózi «urlaǵannan» keıin birinshi bolyp nur-sultandyq seriktesine baılanysqa shyqqan. Birinshi óziniń sýretin, odan keıin talabyn oryndaýdy suraǵan dybystyq habarlama jibergen. Olar kásipkerden 100 myń dollar kóleminde tólem suraǵan. Al kásipker birden polıtsııaǵa habarlasqan. Nátıjesinde bul tórt adamnyń akterlik oıyny ekeni anyqtaldy. Olar 37 jastaǵy bas fıgýrantty otyrǵyzyp, kıimin qanmen bylǵap sýretke túsirgen», - dedi Almaty qalalyq PD krımınaldyq Polıtsııa basqarmasynyń basshysy Erkin Іńkárov.
Polıtseıler sheteldikti jaldamaly páterde jaıbaraqat otyrǵan jerinen tapty. Sol jerde qoıylymnyń «rejısserleri», «stsenarısteri» ustaldy. Almaty qalasynyń PD tergeý basqarmasy árqaısysynyń áreketterine Qazaqstan Respýblıkasynyń zańnamasyna sáıkes sharalardy qoldana otyryp, quqyqtyq baǵa beretin bolady.
