Ózin-ózi taný pániniń muǵalimderi áleýmettik pedagog retinde jumys isteı beredi – mınıstr
Úkimet otyrysynan keıin ókten baspasóz máslıhatynda Bilim jáne ǵylym mınıstrine ózin-ózi taný pánine mamandanǵan pedagogterdi jumyspen qamtý máseolesi týraly suraq qoıyldy.
«Ózin-ózi taný páni birinshiden 11 synypqa deıin mindetti emes, qosymsha pán retinde oqytylyp keldi. Bir jyl emes, bes jyl emes, odan uzaq merzimde osy jaǵdaı qalyptasty. Jumasyna bir sabaq ótkiziledi. Qazirgi ýaqytta qabyldanǵan sheshim týraly jarııalap aıttyq. Ol mynadaı. Kelesi jyldan bastap osy pán tek qana bir synypta, birden 11-ge deıin emes, tek bir synypta ǵana, onyń ózinde oqýshylardyń tańdaýyna baılanysty oqytylady. Eger balalar 5 synypta biz osy pándi tańdaımyz dese, tek osy synyptaǵy balalar oqýǵa múmkindik alady. Al tańdamasa, baıaǵydaǵydaı 1 synyptan 11 synypqa deıin oqytylatyn pán bolmaıdy degen sheshimimiz bar. Osy jumysty bastap júrgizip jatyrmyz», - dedi Ashat Aımaǵambetov.
Onyń aıtýyna qaraǵanda, kelesi oqý jylynda atalmysh pán qysqartylǵan kúnniń ózinde, oǵan mamandanǵan pedagogter jumyssyz qalmaıdy.
«Al kadrlarǵa kelsek, jalpy bizdiń ýnıversıetterde «Áleýmettik pedagog jáne ózin-ózi» taný degen mamandyq boldy. Onyń eń birinshi mazmuny – áleýmettik pedagog biliktiligi. Sondyqtan, olardyń kóbi búginde áleýmettik pedagog retinde jumys istep jatyr. Osy pándi berip júrgen muǵalimderdiń basym kópshiligi – basqa pánniń muǵalimderi. Onyń ishinde psıhologtar, tarıhshylar, basqa pánderdiń muǵalimder bar. Olardyń bári óziniń pánine sáıkes sabaq beredi. Sondyqtan bul jerde eshqandaı másele joq», - dedi mınıstr.
Eske salsaq, QR Bilim jáne ǵylym mınıstrligi «Ózin-ózi taný» pánine qatysty mınıstrlik ókilderiniń kózqarasy týraly málimet bergen edi.
