«Ózin-ózi taný» páninen IV respýblıkalyq pándik olımpıada ótedi

Ótken jyly Astana qalasynda Eýrazııa ulttyq ýnıversıtetinde  ótken olımpıadanyń Bas júldegeri atanǵan Qyzdar ýnıversıteti bıylǵy olımpıadanyń ótkizý mártebesine ıe bolyp, óz dostaryn kıeli shańyraqta qarsy almaq.

Qazaqstan Respýblıkasy Bilim jáne ǵylym mınıstrligi, Qazaq memlekettik qyzdar pedagogıkalyq ýnıversıteti jáne «Bóbek» Ulttyq ǵylymı-praktıkalyq, bilim berý jáne saýyqtyrý ortalyǵynyń uıymdastyrýymen ótkizilgeli otyrǵan bilim saıysyna Almaty, Astana, Taraz,   Aqtóbe, Kókshetaý, Pavlodar qalalarynan 9 komanda qatysady.

Respýblıkalyq olımpıadanyń basty maqsaty - «Ózin-ózi taný» rýhanı-adamgershilik bilim berý baǵdarlamasy boıynsha teorııalyq jáne praktıkalyq bilimderi bar daryndy stýdent jastardy anyqtaý, stýdentterdiń ózin-ózi taný muǵalimi kásibine degen qyzyǵýshylyqtaryn arttyrý, «Ózin-ózi taný» rýhanı-adamgershilik bilim berýdiń jańartylǵan baǵdarlamasynyń tıimdiligin naqtylaý.

Olımpıada «Júrekten júrekke» tanystyrý saıysy, «Oqy, oqy jáne oqy!» teorııalyq jáne praktıkalyq bilimder baıqaýy, «Biz álemdi jaqsartamyz» atty áleýmettik-pedagogıkalyq joba qorǵaý saıysy, «Jalpyadamzattyq qundylyqtardy túrli kórkem  shyǵarmalarǵa ıntegratsııalaý» syndy sahnalaý saıystarynan turady.

Qatysýshylardyń bilimi men sheberligine «Bóbek» ortalyǵynyń qyzmetkerleri, rýhanı-adamgershilik bilim berý salasynyń mamandary, joǵary oqý oryndarynyń jetekshi ǵalymdary, ««Ózin-ózi taný» pániniń ustazdary qazylyq jasaıdy. Qazylar alqasynyń tóraıymy - Adamnyń úılesimdi damýy ınstıtýtynyń bólim bastyǵy, professor Arshagúl Rysbaeva.