«Ózin-ózi retteý» týraly zań kóp salalarda qaǵazbastylyqty azaıtady - UEM

ASTANA. QazAqparat - 2016 jyldyń 15 mamyrynda kúshine enetin «Ózin-ózi retteý týraly» zań kóp salalarda qaǵazbastylyqty azaıtady, deıdi Ulttyq ekonomıka mınıstrligi Kásipkerlikti damytý departamentiniń dırektory Ǵalııa Joldybaeva.

«2015 jyldyń 12 qarashasynda Memleket basshysy «Ózin-ózi retteý týraly» zańǵa qol qoıdy. Osylaısha, bizdiń quqyqtyq tabıǵatta birinshi ret ózin-ózi retteý ınstıtýty paıda boldy. Jalpy, bul ınstıtýt azamattyq quqyqtyq qatynastarda bar ınstıtýt, tek zańmen rettelmegen edi. Zań 2016 jyldyń 15 mamyrynda kúshine enedi. Zań boıynsha, ózin-ózi retteýdiń  eki túri bolady. Birinshisi, mindetti túri. Ekinshisi, erikti túri. Erikti ózin ózi retteý uıymdary 15 mamyrdan bastap paıda bola bastaıdy.  Al, mindetti ózin-ózi retteý uıymdaryna memlekettik fýnktsııalar beriletindikten, bizdiń boljam boıynsha, mindetti ózin-ózi retteý uıymdary aldymen aýdıt jáne baǵalaý salalarynda paıda bolady»,-dep túsindirdi Ǵ.Joldybaeva.

Onyń aıtýynsha, ózin-ózi retteý uıymdary ártúrli salada paıda bolady. Sondaı-aq, Ǵ.Joldybaeva atap ótkendeı, erikti ózin-ózi retteý uıymdary negizgi úsh talapty oryndaýy tıis. Birinshisi, bekitilgen salalyq, ishki erejeler men standarttar; Ekinshisi - óz músheleriniń qyzmetin baqylaý; Úshinshisi: ortaq múlikti jaýapkershilikti qamtamasyz etý.

«Eń bastysy, ózin-ózi retteý uıymdary jumys isteı bastaǵan soń, kez kelgen salada qaǵazbastylyq azaıyp, básekelestik kúsheıedi»,-dep túıindedi sózin Ǵ.Joldybaeva.