Ózin-ózi óltirmek bolǵan aqtóbelik kəsipker jazadan qutyldy
AQTÓBE. QazAqparat - Aqtóbede ózin-ózi óltirmek bolǵan kəsipker jazadan qutylyp ketti. Qylmystyq kodekstiń eki baby boıynsha is toqtatyldy, dep habarlaıdy QazAqparat tilshisi.
Aqtóbe qalasynyń turǵyny ózin-ózi óltirmek bolyp, gaz quıý stantsııasyndaǵy tsısternaǵa soqtyǵysty. Buǵan deıin habarlaǵanymyzdaı, rólde otyrǵan kəsipker din aman. Oqıǵaǵa qatysty Qylmystyq kodekstiń eki baby boıynsha is qozǵaldy.
«Ózin-ózi óltirmek bolyp gaz quıý stantsııasyna kóligimen soqtyǵysqan aqtóbelik turǵynǵa qatysty qylmystyq is toqtatyldy. Gaz stantsııasynyń ıesi tsısternaǵa zaqym kelmegenin habarlady. Tek tsısterna ornynan qozǵalyp ketken. Ózin-ózi óltirýge deıin jetkizý deregi anyqtalǵan joq. Aqtóbelik qarjylyq qıyndyqtarǵa tap bolǵan. Prokýratýra sheshimniń zańdylyǵyn tekserip jatyr»,- dedi Aqtóbe oblystyq prokýratýrasynyń apparat jetekshisi Jasulan Dəýlembaev.
