Ózin-ózi eńbekpen qamtyǵandar zeınetaqyǵa qatysty qıyndyqtarǵa urynýy múmkin

Búgin QR Parlamenti Májilisiniń jalpy otyrysynda Úkimet basshysynyń atyna joldaǵan saýalynda depýtat Aıtkúl Samaqova oslaı aıtty.

«Aǵymdaǵy jyl basynda alynǵan málimetterge súıensek, qazaqstandyqtardyń zeınetaqylyq jınaqtary 2,3 trıllıon teńgeni quraǵan. Bul 8 mıllıon salymshynyń qarajaty. ıAǵnı, orta eseppen alǵanda, bir salymshyǵa 300 myń teńgeden kelip otyr. Atalǵan qarjyny zeınetaqy qorlary zeınetke shyqqandarǵa 5-6 jyldyń ishinde qaıtaryp beredi. Odan keıin zeınetkerler tek birkelki zeınetaqy ǵana ala alady, al zeınet jasyndaǵy adamdardyń sany jyldan jylǵa azaıa bermek. Jasy 55-ke tolǵan azamattardyń jınaqtalǵan zeınetaqysyn ómiriniń sońyna deıin alýy úshin óz jınaqtaryn annýıtettik kompanııaǵa berip, olarmen kelisimshartqa otyrý usynylyp otyr. Biraq, zeınetaqy qorlaryndaǵy salymdardyń mólsheri erler úshin 2 jarym mıllıon, al áıelder úshin 3 mln teńgeni quraýy kerek. 1-shi qańtardaǵy málimetter boıynsha osyǵan sáıkes erlerdiń sany - 25 myń, áıelderdiń sany 9 myń adamdy ǵana quraıdy. Endeshe bunyń ózi ómirlik annýıtettiń tek sanaýly adamdarǵa ǵana qoljetimdi ekendigin ańǵartady», - deıdi A. Samaqova. Depýtattyń aıtýynsha, atalmysh jaǵdaı ózin-ózi eńbekpen qamtyp júrgen, zeınetaqylyq jınaqtary joq 2,6 mıllıon adamǵa qıyndyq týdyrary sózsiz.