Ózin-ózi basqarýdy damytýǵa qoldanystaǵy quqyqtyq baza tolyq yqpal ete almaıdy - Lázzat Súleımen
Senator depýtattyq saýalynda jergilikti ózin-ózi basqarýdy damytý máselelerin kóterdi.
Ol jergilikti ózin-ózi basqarýdy retteý jónindegi qabyldanǵan zańdar men zańnan keıingi aktiler bola tura qoldanystaǵy kúıinde salanyń tolyq jumys isteýine kedergi keltiretin problemalar bar ekenin jetkizdi.
«Qoldanystaǵy quqyqtyq baza jergilikti ózin-ózi basqarýdyń naqty damýyna oń yqpal etpeıdi nemese zańnan keıingi aktiler halyqtyń jaǵdaıy men pikiri eskerilmeı qabyldanady. Qazirgi ýaqytta oblystardyń shaǵyn aýyldyq okrýgterinde qoǵamdyq keńes qyzmetin atqaratyn jergilikti qoǵamdastyq jınalysyn saılaý múmkin emes. Óıtkeni máslıhattardyń 2014 jylǵy sheshimimen daýys berýge quqyǵy bar turǵyndardyń sany jergilikti qoǵamdastyq jıyndaryndaǵy ókilder sanynyń 1 paıyzyn quraıdy», - dedi Lázzat Súleımen.
Senator jergilikti qoǵamdastyqtar jınalysynyń óz betinshe ári jaýapty jumys isteýi úshin quqyqtyq jaǵdaı jasaý qajet dep sanaıdy.
Lázzat Súleımen atap ótkendeı, osy jáne basqa da kemshilikter qazirgi ýaqytta jergilikti qoǵamdastyq jınalysynda bıýdjettik baǵdarlamalardy talqylaý, jergilikti qoǵamdastyqty damytý baǵdarlamasyn qaraý, bıýdjet qarjysynyń paıdalanylýyna monıtorıng júrgizý sııaqty ókilettikterdi tolyq kólemde júzege asyrýǵa múmkindik bermeıdi.
«Osyǵan baılanysty, jergilikti qoǵamdastyqtyń bólek jıyndaryna qatysý úshin teń ókildikti qamtamasyz etý ádistemesin ázirleýdi usynamyn. Kvorým jáne jergilikti qoǵamdastyq jıynynyń saılanǵan ókilderi bolǵan kezde aýdandar men aýyldyq okrýgter ákimderiniń esepterin júrgizýdi qamtamasyz etý kerek. Jergilikti qoǵamdastyqtardyń bólek jıyndary men jalpy jıyndaryn ótkizýdiń zańdylyǵyn qamtamasyz etý jónindegi tıisti uıymdastyrý jáne quqyqtyq sharalar qabyldasyn», - dedi senator.
