Ózin órtep jibermek bolǵan adamdy qutqarǵan tártip saqshysy: Bizge psıholog ta bola bilý kerek
ÓSKEMEN. QazAqparat – Óskemen qalasynda jubaıymen janjaldasyp qalǵan er adam ústine benzın shashyp, óz-ózin órtep jibermek bolǵan. Sýıtsıdtiń aldyn alý úshin tártip saqshysy Azat Artambaev ony áńgimege tartyp, jantúrshiktirer bundaı qadamǵa barmaýǵa shaqyrady. Polıtsııa qyzmetkeri sol oqıǵanyń qalaı bolǵanyn QazAqparat tilshisine aıtyp berdi.
Shyǵys Qazaqstan oblysy burynǵy Marqakól aýdanynda týǵan Azat Artambaev bala kúninen polıtsııa qyzmetkeri atanǵysy kelgen. Búginde bul maqsatyna jetken ol Óskemen qalalyq Polıtsııa basqarmasy polıtsııa patrýldik bóliminde aǵa ınspektor bolyp qyzmet etýde. Áskerı sheni – kapıtan.
«Byltyr tamyz aıynda kezekshi bólimnen Dobrolıýbov kóshesindegi kópqabatty úıdiń podezinde er adamnyń ústine benzın quıyp, ózin órteıin dep jatqandyǵy jaıly habar tústi. Sol jerge qustaı ushyp jetip bardyq. Birinshi oqıǵa ornyna jedel járdem men órt sóndirýshilerdi shaqyrttym. Sodan keıin mańaıdaǵy turǵyndardan 2 shelek sý men kórpe surap aldyq. Іshke kirsem ústi-basyna benzın tókken álgi jigit qolynda ottyq ustap tur. Meni kóre sala «Jaqyndama» dep aqyryp jiberdi», - dep polıtseı sol bir syn saǵatty eske aldy.
Sýıtsıd jasamaq bolǵan jigitti sabyrǵa shaqyrǵan tártip saqshysy ár sózin ańdap aıtqan. Ony bul qorqynyshty qadamǵa barýdan bas tartqyzý úshin áńgimege tartyp, psıhologtyń rólin atqardy.
«Áýelde «Balań bar ma?» dep suradym. Ol «Bir qyzym bar» dep jaýap berdi. Sol kezde oǵan «Eger sen ólseń qyzyńdy kim asyraıdy? Erteń oǵan bári «ákeń ózin órtep jibergen» dep betine baspaı ma!» dep 15 mınýttaı sóılestim. Áıteýir degende er adam túsinip, qolyndaǵy ottyqty maǵan berdi», - deıdi Azat Artambaev.
Sońynan anyqtalǵandaı, qala turǵyny otbasyndaǵy kıkiljińnen keıin óz ózine qol jumsamaq bolypty. Polıtseıler ony bólimshege jetkizip, psıhologııalyq kómek kórsetken.
