Ózin «bank qyzmetkerimin» degen alaıaq Oral turǵynynyń 1,4 mln teńgesin ıemdenip ketken
ORAL. QazAqparat – Oralda alaıaq 62 jastaǵy áıeldiń senimine kirip, 1,4 mln astam teńgesin ıemdenip ketken, dep habarlaıdy QazAqparat tilshisi.
BQO polıtsııa departamentiniń resmı ókili Bolatbek Belgibekovtiń málim etkenindeı, er adam ózin «Kaspı bank» qaýipsizdik qyzmetiniń qyzmetkeri retinde tanystyrǵan.
Ol 1958 jylǵy áıelge «Alaıaqtar sizdiń atyńyzǵa nesıe rásimdegesi kelip júr, oǵan jol bermes úshin ózińiz osylaı jasańyz» dep aldaǵan. Oǵan sengen áıel áýeli ózine, sosyn qyzyna nesıe rásimdegen. Sodan keıin er adam áıelde depozıt bar-joqtyǵyn bilip alyp, qaýipsiz bolý úshin barlyq aqshany jeke esepke aýdarý qajettigin aıtqan.
Osylaısha áıel alaıaqqa barlyǵy 1 mln 440 myń teńgesin aýdaryp jibergen.
Sol sekildi Oral qalasynyń 29 jastaǵy turǵyny belgisiz bireýge aldanyp qalǵan. Alaıaq Kaspi.kz qosymshasy arqyly onlaın nesıe rásimdeımin dep, 56,7 myń teńgesin ıemdenip ketken.
Qazirgi kezde atalǵan qylmystardy ashý úshin jedel izdestirý sharalary júrgizilýde.
Eki oqıǵa boıynsha QR QK 190-baby 2-bóligine (alaıaqtyq) sáıkes qylmystyq is qozǵalyp, tergeý amaldary júrgizilip jatyr.
