Ózimizdiń jáne ózgelerdiń ómirine jaýapkershilikpen qaraıyq - Aıgúl Imanbaeva
NUR-SULTAN. QazAqparat – Ánshi, teatr jáne kıno ártisi, QR eńbek sińirgen qaıratkeri Aıgúl Imanbaeva Qazaqstan halqyn karantın talaptaryn qatań saqtaýǵa shaqyrdy, dep habarlaıdy QazAqparat tilshisi.
«Bul tek bizdiń elge ǵana emes, barsha álemge qaýip tóndirgen indet. Sondyqtan karantındik sharalardy saqtaýda beıqamdyq tanytpaýymyz qajet. Koronavırýs ınfektsııasynyń bar ekenine kúmánmen qaraǵan azamattar jaǵdaıdy sanaly saraptap, qoǵamǵa jaýapkershilikpen qaraý kerek dep oılaımyn. Bul jerde elimizdiń, ultymyzdyń saýlyǵy degen - úlken másele tur. Ózimshildik kózqarastan arylyp, ózgelerdiń ómirine jaýapkershilikpen qaraıyq!», - deıdi ol.
Sondaı-aq, kıno jáne teatr ártisi qazirgi tańda ımmýnıtetti kóteretin dárýmender iship, únemi betperde taǵyp, áleýmettik araqashyqtyqty saqtaý mańyzdy ekenin basa aıtty.
«Taıaýda qys túsedi. Sondyqtan jyly kıinip, dárigerler aıtqan keńesterge qulaq túrgenimiz abzal. Osyndaı qıyn kezeńde bir-birimizge qol ushyn berip, jaqyndarymyzǵa janashyrlyq tanytsaq, indettiń aldyn-alyp, onyń taralýyn tómendete alamyz dep senemin», - dedi QR eńbek sińirgen qaıratkeri.
Sonymen qatar, Aıgúl Imanbaeva koronavırýs ınfektsııasymen kúres jolynda eńbek etip júrgen dárigerlerge alǵysyn jetkizdi.
