Ózim men sábıimniń qamy úshin júkti kezimde vaktsına saldyrdym – jas ana
Jas ana úshinshi sábıin aman-esen ómirge ákeldi, dep habarlaıdy QazAqparat tilshisi.
Raýshan Qabdyǵalıeva Oıyl aýdanynda týyp-ósip, boı jetti. Keıin bilim alyp, aýylǵa jas maman bolyp oraldy. Turmys qurǵan soń Kemel aýylynda turyp jatyr. Álemdi pandemııa jaılap, el ábigerge túsken kezde aýyl halqy qalaǵa qatynaýdy toqtatty. Mundaıda eń qaýipsiz ári jaıly jer aýyl bolǵan edi. Biraq turmystyq qajettilik, jumystyń qamymen júrip-turýǵa týra kelgen shaqta, elge vaktsına jetkizildi. Sol kezde aǵaıyn-týys, ujym, oqýshylar qamyn oılaǵan muǵalimder otbasy birden vaktsına saldyrýǵa sheshim qabyldady.
«Kóktemde vaktsına jetkizile bastady. Ózim mektepte psıholog, al kúıeýim muǵalim bolǵan soń alǵashqylardyń biri bolyp «Spýtnık V» vaktsınasyn saldyrdy. Al men júkti bolǵan soń jańa vaktsınanyń kelýin kúttim. Sóıtip jeltoqsan aıynda Pfizer vaktsınasyn qabyldadym. Ol kezde júktiliktiń 35-36-aptasy edi. Esh keri áseri bolmady. Qoryqpadym, kerisinshe sendim. Ózimniń, balamnyń densaýlyǵy jaqsy», - dedi jas ana Raýshan Qabdyǵalıeva. Qazir kúıeýi ekeýi úsh bala tárbıelep otyr. Úlkeni 4 jasta.
«Vaktsına – aýrýdyń aldyn alý, saqtaný joly. Sol sebepti esh oılanbaı, qoryqpaı qadam jasadym. Ári aýyryp qalsaq aýdan ortalyǵyna baryp, dárigerge qaralýymyz kerek. Munyń bárin esepke alyp, jetkizilgen, tegin «Pfizer» vaktsınasyn saldyrdym. Ózge zamandastaryma da keńes beremin. Bizdiń ujymdyq ımmýnıtettimiz kúshti bolýy tıis», - dedi Raýshan Qabdyǵalıeva.
Aıta keteıik, oblys boıynsha 5 myńǵa jýyq adam Pfizer vaktsınasyn saldyrdy. Onyń 300-ge jýyǵy júkti kelinshek.
