Ozyq IT-sheshimder bar, biraq eskirgen ádister áli de saqtalyp otyr – Úkimet basshysy
ASTANA. KAZINFORM – Qazirgi zamanǵy qaýip-qaterler men tótenshe jaǵdaılarǵa qarsy turý quraldaryn jasaýǵa erekshe nazar aýdarý kerek. Bul týraly Úkimet otyrysynda Premer-mınıstr Oljas Bektenov aıtty.
- Prezıdent Qazaqstandy tsıfrlyq memleketke aınaldyrý mindetin qoıdy. Ozyq tehnologııalar salasynda biz tsıfrlyq sheshimder men qyzmetterdi sátti jasap, sata biletin jetekshi elderdiń qataryna kirýge umtylýymyz kerek. Byltyr tsıfrlandyrý jáne jasandy ıntellekt salasynda birqatar iri jobalar iske asyryldy. Zańnamalyq baza jasaldy, esepteý qýatyn satyp alý qamtamasyz etildi, alem.ai ulttyq jasandy ıntellekt ortalyǵy iske qosyldy. Qazaqstandyq IT-qyzmetter eksportynyń kólemi ótken jyly shamamen bir mıllıard dollarǵa jetti. Bul jumysty belsendi túrde jalǵastyrý kerek, - dedi Úkimet basshysy.
Onyń aıtýynsha, tsıfrlyq tehnologııalar men jasandy ıntellekt salasyndaǵy ınfraqurylymdy damytý otandyq ekonomıkany naqty transformatsııalaý isinde basty ról atqarady.
- Búgingi tańda kúndelikti ómirde keńinen qoldanýǵa arnalǵan sheshimder jetispeıdi. Kompanııalar jańa prototıpterdi usynýmen ǵana shektelmeı, olardy tolyq aıaqtap, is júzinde qoldanýǵa deıin jetkizýi kerek. Tsıfrlandyrý ekonomıkamen jáne kúndelikti ómirmen qatar damyp qana qoımaı, olardyń ajyramas bóligine aınalýy kerek. Bizde ozyq IT-sheshimder bar, biraq eskirgen ádister áli de saqtalyp otyr. Mysaly, qazaqstandyqtar úıdegi eseptegish quraldardyń derekterin áli kúnge deıin telefon arqyly jiberedi. Mundaı mańyzyn joıǵan bıznes-protsester tutas salalarda bar. Qurylysta BIM-modelder joq, bul tıimdi jobalaý men basqarý múmkindikterin shekteıdi, - dedi Oljas Bektenov.
Úkimet basshysy óndiristerde robottandyrý, al aýyl sharýashylyǵynda serpindi IT-sheshimderdi engizý qarqyny baıaý ekenin basa aıtty.
- Sondyqtan ýákiletti organdar ekonomıkaǵa eleýli áseri bolatyn praktıkalyq tsıfrlyq sheshimderge nazar aýdarýy qajet. Qazirgi zamanǵy qaýip-qaterler men tótenshe jaǵdaılarǵa qarsy turý quraldaryn jasaýǵa erekshe nazar aýdarý kerek. Jasandy ıntellekt damyǵan saıyn alaıaqtyq jaǵdaılardyń da anaǵurlym jetilgen túrleri paıda bolady. Іshki ister, Jasandy ıntellekt mınıstrlikteri múddeli memlekettik organdarmen birge osyndaı áreketterdi tıimdi anyqtaý jáne taný tetigin ázirleýi qajet. Jalpy qoldanystaǵy quraldar men tsıfrlyq sheshimderdi jetildirý boıynsha turaqty proaktıvti jumys júrgizý qajet. Bul qoǵamnyń tsıfrlyq sheshimder men onlaın-platformalarǵa degen senimin nyǵaıtýǵa múmkindik beredi, - dedi Premer-mınıstr.
Aıta keteıik, bıyl taǵy 2 spýtnıktik ınternet operatory jumysyn bastaıdy.