Ózgermeıtin bir ǵana nárse: kórermenge árdaıym qyzyqty bolý – Jibek Joly dırektory
ASTANA. KAZINFORM – Eki jyl buryn «Kazakh TV» telearnasyna rebrendıng júrgizildi jáne «Jibek Joly/ Silk Way» shetelde habar taratatyn jalǵyz qazaqstandyq spýtnıktik telearnasy bolyp qaıta quryldy. BAQ qyzmetkerleri kúnine oraı, telearnanyń basqarýshy dırektory Erkejan Kúntýǵan agenttikke suhbat berdi jáne jańa maýsymda qandaı qyzyqty jobalar kórermen nazaryna usynylatynyn aıtyp berdi.
− Bıyl «Jibek Joly» telearnasyna 2 jyl tolady. Telearna birtindep reıtıngter jınap keledi. Al «Silk Way» men «Silk Way Cinema» jobalaryn iske qosý – eksperıment boldy ma?
− Televızııa – barlyq ýaqytta eksperıment alańy bola bermeıdi, munymen kelisetin shyǵarsyz. Al oǵan júgingende bolýy múmkin barlyq saldardy muqııat baǵamdaý kerek.
− Qazir qarasaq, tájirıbeńiz sátti shyqqan sekildi?
− «Silk Way» telearnasynyń jańa formatta iske qosylǵanyn sáttilik dep sanaımyz. Biz «Kazakh TV» telearnasynyń rebrendıngin júrgizdik. Búginde «Silk Way» shetelde habar taratatyn jalǵyz qazaqstandyq spýtnıktik telearna bolyp otyr. Aǵylshyn tilinde birneshe baǵdarlama ashyldy, olar – «New time» aqparattyq-taldamalyq baǵdarlamasy, «Reporter with President» arnaıy jobasy, «Travel and comfort», «Taste Kazakhstan» baǵdarlamalary.
Aıta keterligi, «Silk Way» eksklıýzıvti materıaldaryna TASS, CGTN, Al Jazeera, SSTV sekildi álemniń kóptegen kóshbasshy aqparat quraldary silteme jasaıdy.
Qazirgi ýaqytta «Silk Way» alty tilde – qazaqsha, oryssha, aǵylshynsha, ózbekshe, qyrǵyzsha jáne túrikshe el aýmaǵynan tys jerlerde habar taratady.
Ótken jyldyń qyrkúıeginde iske qosylǵan «Silk Way Cinema» jaqyn ornalasqan 10-nan astam elde táýlik boıy kórsetilip keledi. «Silk Way Cinema» arnasyn qazaqstandyq kreatıvti ındýstrııanyń ambassadory deýge bolady. Telearna kontenti tek qana qazaqstandyq ónimderden quralǵan. Eń aldymen «Qazaqfılmniń» altyn qorynan jáne respýblıkalyq telearnalarymyzdan alynǵan kınokartınalar usynylady.
− Kontent taqyrybyna oıyssaq, «Jibek Joly» tanymaldyǵyna ne áser etti dep oılaısyz?
− Bárinen buryn, basqa telearnalarda kezdespeıtin biregeı janrlardaǵy áleýmettik jobalar der edim. Árıne, munda «Nasha ıstorııa» derekti-kórkem tsıkl fılmin aıtýǵa bolady, onda avtor qazaq halqynyń eń kórnekti tulǵalarynyń ómiri men shyǵarmashylyǵy týraly qyzyqty jáne beımálim faktilerdi baıandaıdy. Sheteldik otbasylar asyrap alǵan qazaqstandyq balalardyń ómirinen syr shertetin «Sheteldegi qazaq balalary» derekti dramasy bar. Dál osy qatarda «Ana bolǵym keledi» realıtı-jobasy tur. Joba aıasynda erli-zaıyptylar EKO baǵdarlamasynan ótedi. Kórermender olardyń ata-ana bolýǵa umtylysyndaǵy kúresine, úmitine, keıde sátsizdikterine kýá bolady.
«Orel ı reshka. Kazahı» halyqaralyq travel-shoýy da erekshe nazar aýdarýǵa turarlyq. «Úkimet.Live» jáne «Májilis.Live» jobalarynda tikeleı efırde Úkimet pen Parlamenttiń jumysyn kórsetemiz. Atqarýshy jáne zań shyǵarýshy organdardyń ǵımaratyna ornatylǵan mobıldi stýdııalar ózekti máselelerdi talqylaıtyn ashyq dıalog alańyna aınaldy.
− Jańa maýsymǵa josparlaryńyz qandaı? Ne nársege basymdyq beresizder?
− Eń aldymen kontenttiń sapasyna basymdyq bermekpiz. Túrli janrdaǵy otandyq serıaldardy qazaq tilinde jaryqqa shyǵaramyz. Máselen, shynaıy oqıǵalarǵa negizdelgen «111» Juz on bir» detektıvti dramasy kórermenge jol tartady. Joba 40 serııadan turady. Bul – bir maýsymdaǵy serıal óndirisi boıynsha qazaqstandyq kınoóndiris naryǵyndaǵy rekord. Basty rólde otbasylyq zorlyq-zombylyqtyń aldyn alý bóliminiń qyzmetkerleri bolady.
Ekinshi serıal «Dıvan batyr» dep atalady, bul komedııalyq melodrama, onyń túsirilimi eldiń ońtústigindegi Naǵı Іlııasov atyndaǵy tabıǵaty kórkem aýylda ótip jatyr. Janryn eskersek, serıal kórermenderdiń kópshiligin qýantady dep oılaımyz. Sondaı-aq, «Tamasha» satıralyq teatryn súıip tamashalaǵan aýdıtorııaǵa tosynsyı ázirleýdemiz. Bul ańyzǵa aınalǵan teatrdyń, qazaq televızııasynyń biregeı baǵdarlamasynyń akterleri men avtorlarynyń shyǵarmashylyǵy týraly serıal. Bizdiń josparymyzda taǵy bir úlken joba bar. Ol jóninde Jańa jylǵa qaraı ańdatpa jasaımyz.
Qazirgi ýaqytta «Taza qala» telejobasyn iske qostyq, bul el Prezıdenti Qasym-Jomart Kemeluly Toqaevtyń «Taza Qazaqstan» bastamasy aıasynda qolǵa alyndy. Ázirge elimizdiń 4 qalasynda túsirilim jumystary ótti. Kórermender onyń jalǵasyn jańa maýsymda da kóre alady.
− «Jibek Joly» telearnasy basqa respýblıkalyq arnalarmen qatar Olımpıada oıyndaryn tikeleı efırde kórsetetin boldy. Bul jumysqa daıynsyzdar ma?
− Daıynbyz. Biz kórermenimizge Parıjdegi olımpıadalyq jarystardyń ańyzǵa aınalatyn sátteri men qyzyqty oqıǵalaryn qoljetimdi etýge tyrysamyz. Árıne, qazaqstandyq atletter baǵdarlamalardyń, arnaıy jańalyq shyǵarylymdarynyń keıipkerleri bolady. Qazaqstan quramasy Eıfel munarasynyń kishkene bólshegi bar medaldardy kóptep jeńip alady dep úmittenemiz.
Taǵy aıtqym keletini, bizdiń tehnıkalyq múmkindikterimiz álemniń kez kelgen jerinde, tipti eń qıyn jaǵdaılarda da onlaın-translıatsııalardyń sapasyn qamtamasyz ete alady.
− Sizderdiń kórermenderińiz kim?
− TNS agenttiginiń málimetinshe, qazirgi ýaqytta aýdıtorııamyzda 55+ jastaǵy býyn basym. Sonymen qatar, 6-dan 17 jasqa deıingi jas urpaq ta bizdiń arnany tamashalaıdy. Jáne munda ózimizge tek artyqshylyqtardy taptyq. Shynynda da, tsıfrlyq jáne aqparattyq tehnologııalar damyǵan, jastar dástúrli BAQ-tan alystap bara jatqan dáýirde olardyń nazaryn aýdarý ońaı emes. Jalpy, biz otbasylyq telearnamyz. Sondyqtan kishkentaı kórermennen bastap, báriniń qyzyǵýshylyǵyn eskeremiz. Bul rette biz barynsha mobıldi jumys isteýge tyrystyq. Mysaly, kórermender bir ýaqytta ózderiniń súıikti telehıkaıasyn nemese fılmderin kóre alady jáne eldegi mańyzdy oqıǵalardan habardar bolady. Basqasha aıtqanda, bizdiń kontent tek efırmen shektelmeıdi, kez kelgen ýaqytta jáne barlyq jerde qoljetimdi.
− Efırdiń bet-beınesi telejúrgizýshiler ekeni belgili. Al olardyń artynda kim tur?
− Bizdiń tutas komandamyz tur. Ekranda jarqyraıtyndar da, kadr syrtynda jumys isteıtinder de – árqaısysy óziniń eleýli úlesin qosady. Bizdiń komanda áli jas jáne bir orynda turmaımyz, izdenemiz, damımyz, úzdik bolýǵa umtylamyz. Tájirıbeli aǵa qyzmetkerler ishki tálimgerlikti belsendi damytýda. Maqsut Nárikbaev atyndaǵy KAZGıÝÝ ýnıversıtetimen yntymaqtastyq aıasynda Halyqaralyq jýrnalıstıka mektebinde dárister ótkizemiz. Aıtpaqshy, árqaısymyzda ósýge jáne óz áleýetimizdi tolyq iske asyrýǵa tolyqqandy múmkindik bar.
Shyndyǵynda, ýaqyt ózgeredi, aýdıtorııanyń qyzyǵýshylyǵy ózgeredi, biz de ózgeremiz. Bir ǵana nárse ózgerissiz qalady – kórermenge árdaıym qyzyqty bolý.
