Ózgeniń perzentin bóten kórmegen – qazaqtyń 3 balasyn asyrap alǵan otbasy jaıly

Medıtsına salasyn tańdady

Ekaterına Tarbaǵataı aýdanynyń týmasy. Qazir Aqjar aýylynda turady. Ol úshin otbasydan asatyn qundylyq joq.

– Shańyraqta beseý edik, men ekinshisimin. Segizinshi synypqa deıin týǵan aýylymda oqydym, sosyn mamandyq alý úshin bir jaqqa ketý kerek boldy. Qurbylarymmen medıtsına salasyn tańdadyq, - deıdi ol.

Sóıtip on bes jastaǵy qyz Altaı aýdanyndaǵy medýchılışege qujat tapsyrdy. Úsh jyl oqyp shyqqan soń joldama negizinde Batys Qazaqstandaǵy Shevchenko qalasyna taban tiregen. Sol ólkede úsh jyldaı jumys istedi.

Sodan keıin týǵan jerge qaıta oraldy. Bala kúninen tanys janǵa turmysqa shyqty. Mıhaıl men Ekaterına ómirge eki ul ákeldi. Teteles týǵan Vasılıı men Volodıa besinshi-altynshy synypta oqyp júrgende aýylǵa Soltústik Qazaqstannan úsh aǵaıyndy bala kóship keldi. Analary ómirden qaıtqan olardyń ákesi úsh ulymen kindik qany tamǵan Aqjar aýylyna qaıta qonystanǵan.

– Birde ulym Volodıa: «Mama, Marat synyptasymdy qonaqqa shaqyrsam bola ma? Monshaǵa da túsip alsyn» dep surady. Men qarsy emes edim, «Kelsin, árıne!» dep kelisim berdim, – deıdi Ekaterına Alekseevna.

Sodan Volodıa: «Marat bizdikinde túnep shyqsa bola ma?» dep taǵy bir surapty. Anasy qabaq shytpaı, ruqsatyn bergen. Ana mahabbatyna muqtaj balaǵa jany ashyǵan. Marattan keıin aǵasy Azamat keldi. Az ýaqyttan soń Agapıtovtardyń januıasyn úıdiń úlkeni Qaırat kelip toltyrdy. Eki inisi birjola kóship keletin bolyp, tek Qaırat azdaǵan ýaqyt ákesiniń janynda qaldy. Alaıda ákeleri ishimdikke úıirsektengen soń tuńǵysh ul da Agapıtovtardyń otbasyna kelgen.

Mısha aǵaı men Katıa apaı

– Joldasym ekeýimiz uldarǵa: «Bizdi ana, áke dep ataýdyń qajeti joq» dep birden aıttyq. Olarǵa ómir syılaǵan óz ata-anasy bar, azan shaqyryp at qoıyp, tal besikten tárbıe bergen de solar. Úlkendi tyńdap, bir-birlerine qolushyn berýge úıretken analarynyń keremet jan bolǵandyǵyna kúmánim joq. Ajal kelip alyp ketpegende úsheýin de azamat qylyp ósirip-jetkizer me edi? Qysqasy, uldar meni «Katıa apaı», keıde jaı ǵana «apaı», jubaıymdy «aǵaı», «Mısha aǵaı» dep júrdi. Osylaı degenderi oryndy bolǵan sııaqty, – deıdi Ekaterına.

Qushaǵy keń ana úsheýine udaıy «uldarym meniń» deıdi. Jaryq dúnıege ózi ákelmegenimen, týǵanyndaı bolyp ketken. «Mynaý bizdiń bala, bular bóten» dep bóle-jarmady.

– Jasyratyny joq, tárbıege kelgende qatal boldyq. Jubaıym «alǵan zatyńdy ornyna qoı» dep tártipke úıretip, er azamattyń ıkemi keler jumystyń barlyǵyna baýlydy. Sharýaǵa kelgende eshbiri tıip-qashpady. Úıdegi jaǵdaıdyń qıyn ekendigin olar da uǵyndy. Otbasynda bir ózim jumys istedim. Men dárihanadamyn, otaǵasy aýyldyń kúıbeńimen nápaqa taýyp júrdi. Mal baqpasaq kún keshýimiz neǵaıbyl edi. Shóp shabý naýqanynda uldar naǵyz qolqanat. Jumystan keshigip jatsam, sıyrdy ózderi saýatyn, - deıdi ol.

Birde Qaıratqa ákesi úsh ulyna birdeı qonyp ketsin dep ótingen.

- Sony aıtyp, menen ruqsat surady. Іnileriniń barǵylary joq. «Bas tartpańdar, balalary kelsin dep ótingen eken demek qalaýy sol bolǵan» dep túsindirip baqtym. Sonda da barmaımyz dep qasarysty. Bárin estip-bilip turǵan jubaıym da «Baryńdar, ákeleriń ǵoı. Erteń qaıtyp kelesińder» dedi, - deıdi Ekaterına Agapıtova.

Kelesi kúni kóńilin úreı shalǵan Qaırat qana oralǵan. Sóıtse Azamat pen Maratty Balalar úıine alyp ketipti. Eresek, ári jarty jyldan soń 18-ge tolatyndyqtan ózin áketpegen.

- Jan-jaqtan kómek izdep, janymdy qoıarǵa jer tappadym. Aýyl ákimdiginen bastap qamqorlyqqa alý bólimine deıin esigin qaqtym. Dese de qujat júzinde biz uldarǵa eshkim bolmaǵandyqtan, bári beker boldy, - deıdi áıel.

Azamat pen Maratty Kókpekti aýdanyndaǵy Balalar úıine resimdegen eken. Joldasy ekeýi buny bilgende birden sonda tartty.

- Uldar bizdi kóre sala eńkildep jylap jiberdi. Aıaýshylyqtan júregim qars aıyrylyǵandaı… Sondaǵy meńgerýshimen sóılesip kórip edim, túk shyqpady: qolymdaǵy tıisti eshbir qujat joq, sol sebepti alyp ketýge ruqsat bermedi. Sodan meıilinshe jıi júzdesip turdyq. Kelgen saıyn kıim-keshek pen táttiler ákelemiz. Kanıkýl kezinde qolhat jazdyryp olardy úıge alyp ketýge ruqsat berdi. Sóıtip, Balalar úıindegi eki jyl da synaptaı syrǵyp ótti. Toǵyzynshy synypty támamdaǵan soń Marat pen Azamat Samardaǵy kolledjge tústi, - deıdi Ekaterına.

Birinen soń biri úılendi

Samardaǵy ýchılışede oqyp júrip Marat bir burymdymen kóńil qosty.

– Gúlfııanyń bııazy minezin unattym. «Birge turǵylaryń kelse, qarsylyǵym joq» degenim bar. Biraq bala-shaǵalaryń ajyrasý men Balalar úıi týraly estimeıtin bolsyn, – dedi Ekaterına Alekseevna.

Osydan soń eki jastyń nekesi qıylyp, kórshi-qolań kelip dastarhan basynda aqjarma lebizderin bildirdi.

– Sosyn úlkenim Qaırat shanyraq kóterdi. Jubaıy Nastıa da sondaı jaqsy qyz. Artynsha Azamat Alenaǵa, Vasıa Maııaǵa úılendi. Qaı kelinimdi alsam da jolym boldy, ózgelerge de sony násip etsin. Ázirge Volodıam boıdaq, - deıdi áıel.

Osylaısha, erli-zaıypty bes uldy qatardan qaldyrmaı jetkizgen. Aşy sýdy eshbiri tatyp almaǵan, shylym da shekpeıdi. Úı sharýasyna kelgende tap-tuınaqtaı, bala kezderinen Mıhaıl Agapıtovtyń «alǵan zatty oryndaryna qoıyńdar» degenin bir sát esten shyǵarmaǵan.

Eki tilde erkin sóıleıdi

Ekaterına Agapıtova qazir Aqjar aýylyndaǵy ftızıopýlmonologııa ortalyǵynda jumys isteıdi. Naýqastarmen qazaq, orys tilinde erkin sóılesedi.

– Birinshiden, ǵumyr boıy Tarbaǵataı aýdanynda turdym, ekinshiden, otbasymnyń ózi ınternatsıonaldy ǵoı. Týǵan uldarym da qazaqshaǵa aǵyp tur. Odan qalsa, Qaırat, Marat, Azamat, Vasıanyń januıasy eki ulttyń baılanysynan ushtasty, - deıdi Ekaterına Agapıtova.