Ózgeniń múlkin urlaý jalpy qylmystyń 60 paıyzyn quraıdy - Ahmetjan Esimov
ALMATY. 9 tamyz. QazAqparat - Alǵashqy jartyjyldyqta tirkelgen 6283 qylmystyń 4909-y ózgeniń múlkin urlaýǵa qatysty boldy. Ony qala ákimi Ahmetjan Esimov búgin Almatyda qoǵamdyq tártipti saqtaý máselelerine arnalǵan alqaly jıynda aıtty.
«Іshki ister depertamenti bastyǵy qylmystyń 50 paıyzyn Qazaqstannyń ózge aımaqtarynan kelgen tulǵalar jasaıtynyn aıtyp otyr. Qazir bizde 110 myń mıgrant bar. Bul qala turǵyndarynyń 0,5 paıyzyn quraıdy. Jurtshylyqtyń olardy baqylaýǵa alýǵa múmkindigi bar. Eger kúdikti áreketi baıqalsa ýchaskelik ınspektor men quzyrly organdarǵa habarlap tıisti shara qabyldaý kerek», - deıdi A.Esimov. Qala basshysynyń aıtýynsha, qazir kóptegen azamattar salyq organynda tirkelmeı, esh kelisimsiz páterin jalǵa bergendikten onda kim turatynynan eshkim habarsyz bolyp otyr. Kóbi páterin saǵattyq jalǵa berý arqyly, qylmys jasaýǵa qolaıly jaǵdaı týdyrady. Oǵan «Aq kent» turǵyn úı keshenindegi oqıǵa mysal bola alady. Jaqynda Іshki ister departamenti qyzmetkerleri 2 polıtseıdiń ólimine qatysty 6 qylmyskerdiń kózin joıdy. Qylmyskerler jasyrynǵan páter salyq organynda tirkelmeı jalǵa berilgen. Olardy zalalsyzdandyrýda materıaldyq shyǵyn keldi. Endi biz memlekettiń esebinen túrli deńgeıde búlingen 8 páterdi jóndeý júrgizip, múlikti qalpyna keltiremiz. Onda beıbit turǵyndar zardap shegýi de múmkin edi. Quqyq qorǵaý organdary naqty operatsııa júrgizip, turǵyndardy der kezinde kóshirgendikten turǵyndar arasynda da, quqyq qorǵaýshylar arasynda da eshkim zardap shekken joq.
Ahmetjan Esimov: «Qazir salyq departamentinde jyljymaıtyn múlikti jalǵa berýmen aınalysatyn 7880 jeke kásipker tirkelgen. Olardyń bıýdjettik túsimi 553 mıllıon teńgeni quraıdy. Bul óte az. Bir tekserý kezinde «Aq kent» turǵyn úı kesheni yqsham aýdanynda ǵana 255 jalǵa berýshi anyqtaldy. Ákimshilik kodeks boıynsha aıyppul kólemi 20 AEK nemese 32 myń teńge. Al bir bólmeli páter jalǵa berý 80-120 myń teńge aralyǵynda. Salyq komıtetine páterin jalǵa berýshilerge qatań tekserý júrgizýge tapsyrma berem. Sondaı-aq óz orynbasaryma úkimetke mundaı tirtip buzýshylyq úshin ákimshilik aıyppuldy kóterý úshin quzyrly organdarmen birlesip usynys jasaýmen aınalysýǵa tapsyrma berem. Bul memlekettik qorjynyna túspegen qarajat qana emes, tártip pen qaýipsizdik úshin kerek», - degendi aıtty.
