Ózgeniń múlkin urlaǵandar qatań jazalanady -Demeýov
KÓKShETAÝ. QazAqparat - Aǵymdaǵy jyldan bastap QR ІІM-men birneshe ret urlyq jasaýǵa qatysty qylmystyq jaýapkershilikti qataıtý jóninde usynys jasaldy. Bul týraly QR Іshki ister mınıstriniń birinshi orynbasary, polıtsııa general-leıtenanty Marat Demeýovtyń Aqmola oblystyq ІІD jeke quramymen kezdesýinde aıtyldy, dep habarlaıdy «QazAqparat» HAA tilshisi.
Kezdesýde oblys polıtseıleriniń 2016 jyldaǵy jumystarynyń qorytyndysy shyǵaryldy. Oǵan oblystyq ІІD apparat jáne aýmaqtyq bólimsheleriniń basshylary qatysty. Oblystyq ІІD Erjan Sádenov ótken jyly atqarylǵan jumystar týraly baıandap berdi.
Onyń aıtýynsha, júrgizilgen aldyn alý sharalarynyń nátıjesinde oblys aýmaǵynda qylmystyń sany azaıǵany baıqalady. Máselen, aýyr jáne óte aýyr qylmystary 79,6 paıyzǵa azaıǵan. Onyń ishinde aýyr qylmys 77,7 paıyz bolsa, óte aýyr qylmys 94,5 paıyz.
«2016 jyly aqmolalyq polıtseıler 127 qylmyskerdi ustady. Olardyń arasynda adam óltirý, qaraqshylyq shabýyl, zorlaý, aqsha bopsalaý jáne tonaýshylyq tárizdi qylmystar bar. Al, esirtki saýdasyna qatysty qylmystarǵa keletin bolsaq, byltyrǵy jyly 149 qylmys tirkelip, 685 keli ártúrli esirtki zattary tárkilendi. Bul ótken jylmen salystyrǵanda 9 qylmysqa kóp», dedi ІІD basshysy óz sózinde.
Kezdesýde ózgeniń múlkin urlaý, tonnaýshylyq tárizdi ózge qylmys túrlerine qatysty máseleler de sóz boldy.
Osyǵan oraı, Marat Demeýov aǵymdaǵy jyldy ózgeniń múlkin urlaýmen kúres jyly dep jarııalaýǵa bastamshyldyq tanytty. Bul baǵytta turǵyndarmen, ásirese, aýyldyq jerlerdegi halyqpen mal urlyǵynyń aldyn alý úshin profılaktıkalyq jumystardy júrgizý jáne esepte turǵan tulǵalardy baqylaýǵa alý kerektigin aıtyldy.
«Mindetti túrde 2015-2017 jyldarǵa arnalǵan ózgeniń múlkin urlaýǵa qarsy is-áreket boıynsha baǵdarlamany taǵy bir ret qaıta qarap, odan ári júzege asyrylatyn naqty sharalardy belgileý qajet », dedi Marat Demeýov.
Sonymen qatar, kezdesýde ІІD apparat jáne aýmaqtyq bólimsheleri basshylarynyń esebi tyńdalyp, jergilikti polıtsııa qyzmetiniń jumysy sóz boldy. Jıyndy qorytyndylaǵan QR ІІM birinshi orynbasary elimizdegi zańnamadaǵy sońǵy ózgeristerdi túsindirip, qoǵamdyq tártip saqtaýdaǵy naqty mindetterdi belgiledi.
«Ótken jyly Elbasy men ІІM alǵa qoıǵan mindetterin oryndaýda vedomstvo tarapynan aýqymdy jumystar atqaryldy. Bıylǵy jyl odan da nátıjeli bolýy úshin barlyq kúsh jigerimizdi salýymyz qajet», - polıtsııa general-leıtenanty Marat Demeýov.
Aslan Ospanov.
