Ózgeniń atyn jamylǵan eki kúdikti 8,5 mln teńgeniń taýaryn elge kirgizbek bolǵan

QOSTANAI. QazAqparat – Qostanaı oblysyna qarasty Qarabalyq aýdanynda ornalasqan «Qaıraq» ótkizý pýnkti arqyly Reseıden elimizge 5,7 tonna taýardy zańsyz kirgizbek bolǵandar ustaldy. Bul týraly QazAqparat tilshisi atalǵan óńirdiń Memlekettik kirister departamentine silteme jasap habarlaıdy.

«Ótken aıda «Qaıraq» avtomobıl ótkizý pýnktinde salmaǵy 5,7 tonna taýardy (santehnıkalyq buıymdar men halyq tutynatyn taýarlar) Reseıden zańsyz ımporttaǵan «Hyundai» jáne «Foton» markaly 2 avtokólik júrgizýshisi ustaldy. Taýardyń jalpy quny 8,5 mln teńgeden asady. Eki jaǵdaıda da júrgizýshiler taýardyń qujatyn rásimdeý kezinde qatysy joq ózge tulǵalardyń derekterin zańsyz paıdalanǵan. Jeke málimetter áleýmettik jeliler sııaqty aqparattyń erkin kózderinen alynǵan bolýy yqtımal», - dep málim etti jergilikti jaýapty organnan.

Bul áreketke qatysty mán-jaıdy anyqtaý úshin qazaqstandyq tarap júkti Reseıdiń Federaldy keden qyzmetine bergen.