Ózge ult ókilderi arasynda «Abaı oqýlary» respýblıkalyq baıqaýy ótedi
ASTANA. 7 sáýir. QazAqparat - QR Mádenıet jáne aqparat mınıstrliginiń Til komıteti 2012 jylǵy qyrkúıek aıynda HІV Qazaqstan halqy tilderi festıvali aıasynda ózge ult ókilderi arasynda «Abaı oqýlary» respýblıkalyq baıqaýyn ótkizedi,
dep habarlady vedomstvonyń baspasóz qyzmetinen.
Baıqaý memlekettik tildiń qoldaný aıasyn keńeıtý jáne Abaı shyǵarmashylyǵyn nasıhattaý arqyly qazaq mádenıetine, tili men ádebıetine degen ózge ult ókilderiniń yqylasyn arttyrý, qazaqstandyq rýhanı birlikti qýattaý, otansúıgishtik sezimdi arttyrý maqsatyn kózdeıdi.
Baıqaý sharttary boıynsha, «Abaı oqýlary» baıqaýyna Qazaqstanda turatyn ózge ult ókilderi ǵana qatysa alady. Ár oblystan jáne Almaty, Astana qalalarynan kórkem sóz oqý men án aıtý sheberlikterin qatar ıgergen 16 - 30 jas aralyǵyndaǵy 1 úmitkerden qatysa alady.
Baıqaý úsh tapsyrmadan turady:
1. Kórkem sóz oqý sheberligin aıqyndaý:
- Abaı shyǵarmalaryn (poezııa, qara sózderi) qazaq tilinde jatqa oqý;
- «Abaı joly» romanynan qazaq tilinde jatqa úzindi oqý.
2. Ánshilik qabiletin tanytý - Abaı ánderin nemese qazaq halyq ánderin oryndaý (1 án).
Baıqaýdyń birinshi kezeńi jergilikti deńgeıde ótkiziletin bolady, jeńimpazdar respýblıkalyq baıqaýǵa joldama alady.
Respýblıkalyq baıqaýdyń sarapshylary baıqaýǵa qatysýshylardy aldyn ala tyńdap, sahnadan oqylatyn óleńderin irikteıdi.
Úmitkerler ónerin baǵalaý kezinde kórkem mátindi oqý sheberligine,
qazaq tilinde orfoepııalyq turǵydan taza sóıleýine, án oryndaý qabiletine, sahnalyq mádenıetine nazar aýdarylady.
