Ózge kandıdattar nege az daýys aldy - AQSh sarapshysynyń pikiri

ASTANA. QazAqparat – AQSh-tyń Djeımstaýn qorynyń aǵa ǵylymı qyzmetkeri Margarıta Assenova Qazaqstanda kezekten tys ótken prezıdent saılaýynda alty kandıdattyń beseýi nege tym az daýys alǵany týraly paıymyn bólisti, dep habarlaıdy QazAqparat tilshisi.

«Saılaý jaqsy uıymdastyrylyp, ótkizilgenin kórdik. Sonshalyqty úlken bir problema da baıqaǵan joqpyz. Bizdiń baıqaýshylar da ózimiz sóılesýge múmkindik alǵan ózge halyqaralyq baıqaýshylar sııaqty qandaı da bir problema kórgen joq. Keshegi saılaýda neni baıqadyq? Jalpy, halyqtyń búkil nazary jalǵyz kandıdatqa oıysty. Ol adam aqyrynda saılaýda jeńiske jetti jáne aldaǵy 7 jylda prezıdent bolady. Bul – jaqsy. Al ózge kandıdattar óte az daýys aldy. Biz sóılesken saılaýshylardyń bári basqa kandıdattardy múlde tanymaıtynyn aıtty. Olar saılaýǵa deıin atalǵan kandıdattardy múlde kórmegen, olar jaıly eshqashan estimegen, eshteńe bilmegen. Sondyqtan saılaýshylar ózderi jaqsy tanıtyn jáne elde reforma júrgizip jatqan kandıdatqa daýys beredi. Prezıdent Q.Toqaevtyń paıdasyna nege sonsha kóp daýys berilgenin osymen túsindirýge bolady», - dedi Margarıta Assenova.

Onyń paıymynsha, kandıdattar arasynda qazirgi prezıdentten basqa da bilikti úmitkerler bolǵan. Biraq olarǵa tanymaldylyq jetispegen.

«Taǵy bir másele, keı kandıdattar shynymen de joǵary bilikti, sapaly úmitker boldy. Olardyń bekgraýndy shynymen de prezıdent, mınıstr deńgeıindegi basshylyq laýazymdardy atqarýǵa laıyq edi. Biraq olardyń 30 kún ǵana ýaqyty boldy. Osy 30 kúnniń ishinde óz úgit-nasıhatyn búkil el boıynsha júrgizip, ózderin tanytý úshin saılaýshylarmen kezdesip, sóılesýi kerek edi. Osynyń bárine eger kandıdat ábden qalyptasqan, kún saıyn teledıdardan kórsetip jatatyn kóshbasshy tulǵa bolmasa, 30 kún jetkiliksiz edi. Jarııa keńistikke endi ǵana shyqqan kez kelgen kandıdatqa 30 kún jalpy jurttyń qoldaýyna ıe bolý úshin jetkiliksiz. Sondyqtan olar 2-3 paıyz ǵana daýys aldy. Biz óz málimdememizde keleshekte úgit-nasıhatqa beriletin ýaqytty uzartyp, 30 kúnnen 60 kúnge jetkizýdi usynamyz. Nemese kandıdat prezıdent saılaýyna túsýdi josparlaǵan kandıdattar tym erteden saıasatpen aınalysyp, saılaýshylardyń nazaryn ózderine aýdarýy kerek. Keshe bir ýnıversıtetten qatysqan baıqaýshy boıjetken AQSh-taǵy senatorlar, saıasatkerler kelesi saılaýǵa daıyndyqty keshe bolǵan saılaýdyń erteńinde bastap ketetinin aıtty. Al Qazaqstannyń úmitkerleri saılaýǵa 30 kún qalǵanda úgitti bastaıtynyn aıtyp, salystyrdy. Al kelesi saılaýǵa deıin búgingi kandıdattar qaıtadan únsiz qalýy múmkin degen boljamyn jetkizdi. Kelesi saılaýda taǵy jańa esimder shyǵýy yqtımal», - dep túıindedi ǵalym.

Aıta keteıik, Ortalyq saılaý komıssııasy prezıdent saılaýynyń aldyn ala nátıjesin jarııalaǵan bolatyn.