Ózge elge qonys aýdarýshylar qujattaryn mıgratsııalyq HQO-da rásimdeı alady
«Azamattarǵa arnalǵan úkimet» memlekettik korporatsııasynyń málimetinshe, eńbek mıgranttaryna arnalǵan kóshi-qon ortalyqtarynda kórsetiletin memlekettik qyzmetter sany artty. Budan buryn atalmysh ortalyqta sheteldikter jumys isteýge ruqsat alyp, QR aýmaǵyna ýaqytsha keletinderge jeke sáıkestendirý nómiri ǵana beriletin.
«Elimizde 12 kóshi-qon ortalyǵy jumys isteıdi. Búgin taǵy bir ortalyqty Qyzylorda qalasynda ashyp otyrmyz. Qazaqstanǵa keletin eńbek mıgranttary kóp, biraq barlyǵy birdeı qyzmetin zańdastyra bermeıdi. Birneshe memlekettik organnyń arasyndaǵy sergeldeńnen soń olar qujattaryn retteýge asyqpaıdy. Kóshi-qon ortalyǵy kóleńkede júrgen eńbek mıgranttarynyń zańdy túrde tirkelýine yqpal etedi. Osy rette kóshi-qon HQO-sy arqyly kórsetiletin qyzmetter sany kóbeıetin boldy», - dep atap ótti memlekettik korporatsııanyń basqarma tóraǵasy Ablaıhan Ospanov.
2019 jylǵy aqpan aıynyń sońyna deıin kóshi-qon ortalyqtary kelesi qyzmetterdi kórsetedi:
- QR aýmaǵyna ýaqytsha keletin sheteldikter men azamattyǵy joq tulǵalardy tirkeý;
- QR tysqary aımaǵyna turaqty turýǵa shyǵatyndardyń qujattaryn rásimdeý;
- QR vızalaryn berý boıynsha qabyldaýshy tulǵalardyń shaqyrýlaryn qabyldaý jáne kelisý.
Búginde ІІM-men birlesip ashylǵan mıgratsııalyq HQO-da eńbek mıgranttary qajetti memlekettik qyzmet túrlerin «bir tereze» qaǵıdaty boıynsha ala alady. Bul jerde medıtsınalyq tekseris pen daktıloskopııadan ótip, saqtandyrý polısin de qosa rásimdeýge bolady. Buryn mıgranttar eńbek etýge beriletin ruqsat qujattaryn alý jáne onyń merzimin uzartý úshin 6 memlekettik mekemege baryp, 3-5 kúnin jumsaıtyn. Qazir qajetti qujattardy kóshi-qon ortalyǵy arqyly bir saǵattyń ishinde rásimdeýge bolady.
