Ózge elderdegi qarýly qaqtyǵystarǵa qatysqandar jazalanady: prokýratýra úndeý jasady

ASTANA. QazAqparat – Elimizde azamattardy ózge elderdegi qarýly qaqtyǵysqa shaqyrý týraly úgit-nasıhat materıaldarynyń tarala bastaýyna baılanysty prokýratýra el turǵyndaryna úndeý jasady, dep habarlaıdy QazAqparat Qyzylorda oblytyq prokýratýrasynyń baspasóz qyzmetine silteme jasap.

QURMETTІ AZAMATTAR!

Sońǵy ýaqytta áleýmettik jeliler men ınternet-resýrstarda shetel jáne Qazaqstan azamattaryn ózge elderdegi qarýly qaqtyǵystarǵa shaqyrý týraly úgit-nasıhat materıaldary taralýda.

Onyń ishinde jaldamaly áskerı toptar belsendi túrde adamdar jınap, azamattarǵa qomaqty jalaqy, syıaqy tóleıtindigimen qyzyqtyrýda.

Sondyqtan qarýly qaqtyǵysqa qatysqan azamattar úshin qylmystyq jaýaptylyq kózdelgenin eskertemin.

Qazaqstan Respýblıkasy Qylmystyq kodeksiniń 170-babyna sáıkes jaldamalyny azǵyryp kóndirý, oqytyp-úıretý, qarjylandyrý nemese ózge materıaldyq qamtamasyz etý, sol sııaqty ony qarýly qaqtyǵysta, soǵys qımyldarynda nemese konstıtýtsııalyq qurylysty qulatýǵa nemese oǵan nuqsan keltirýge baǵyttalǵan ózge de kúsh qoldaný áreketterine paıdalaný ne memlekettiń aýmaqtyq tutastyǵyn buzǵany úshin múlki tárkilenip, 12 jylǵa deıingi merzimge bas bostandyǵynan aıyrýǵa, sondaı-aq adamdardyń qaza tabýyna nemese ózge de aýyr zardaptarǵa ákep soqqan osyndaı is-áreket úshin 20 jylǵa deıingi nemese ómir boıyna bas bostandyǵynan aıyrý jazasy qoldanylady.

Al Qazaqstan Respýblıkasy azamatynyń shet memlekettiń aýmaǵyndaǵy qarýly qaqtyǵysqa nemese soǵys qımyldaryna jaldamalylyq belgileri bolmaǵan kezde qasaqana quqyqqa syıymsyz qatysýy Qylmystyq kodekstiń 172-babymen saralanyp, bes jyldan toǵyz jylǵa deıingi merzimge bas bostandyǵynan aıyrýǵa jazalanady.

Zańdylyqty jáne qoǵamdyq qaýipsizdikti qamtamasyz etý, quqyq buzýshylyqtardyń aldyn alý, sondaı-aq adamnyń jáne azamattyń quqyqtary men bostandyqtaryn qorǵaý maqsatynda «Prokýratýra týraly» Konstıtýtsııalyq zańnyń 40-babyn basshylyqqa ala otyryp, azamattardy arandatýshylyqqa boı aldyrmaýǵa jáne qoldanystaǵy zańnama normalaryn múltiksiz saqtaýǵa shaqyramyn.

«Quqyq qorǵaý organdary belgilengen tártipke, qoǵamdyq qaýipsizdikke qol suǵatyn kez kelgen quqyq buzýshylyqtyń jolyn kesedi, sondaı-aq olarǵa jol bermeý jóninde zańda kózdelgen sharalardy qoldanady»,-delingen Qyzylorda oblysynyń pokýrory N. Bıjanovtyń habarlamasynda.