Ózge áıelderge kóz salǵyzbaıtyn gormon tabyldy
ASTANA. 28 qarasha. QazAqparat - Nemis endokrınologteri er adamdardyń súıgen qyz-kelinshekterin ajarlyraq ete túsýdiń amalyn tapty. Budan bylaı oksıtotsın gormonynyń kómegimen áıelder kúıeýleriniń sýyq júrisin tyıatyn bolady.
«RIA Novostı»-diń habarlaýynsha, Bonn ýnıversıtetiniń ǵalymdary 20 erkekti qatystyryp, zertteý júrgizgen. Olardyń bir toby muryndaryna oksıtotsıni bar spreıdi, ekinshi toby platsebony tamyzǵan. Synaqqa qatysýshylar óz áıelderiniń jáne basqa bir tanys qyz-kelinshektiń sýretterine baǵa berýi kerek boldy. Tájirıbe barysynda erlerdiń mıy magnıtti-serpindi tomografııaǵa túsirildi. Zertteýdiń nátıjesinde murnyna oksıtotsın tamyzǵan erlerdiń óz kelinshekteriniń sulýlyǵyn joǵary baǵalaǵany anyqtaldy. Ekinshi toptan mundaı erekshelik baıqalmaǵan. Ǵalym Rene Hýrlemannyń aıtýynsha, oksıtotsın gormony er adam mıyndaǵy «yntalandyrý júıesiniń» jumysyn kúsheıtedi. Sonyń áserinen erkektiń ińkárligi artyp, súıgenine baýyr basady, shyn beriledi, dep jazady "Alash aınasy" basylymy.
