«Ózenmunaıgazdyń» jyl saıynǵy tabysy 2 trln teńge me - QMG jaýap berdi
QMG málimetinshe, «Ózenmunaıgaz» AQ-nyń shıkizat satýdan túsetin jyl saıynǵy tabysy 2 trln teńge degen aqparat shyndyqqa janaspaıdy.
Energııa resýrstarynyń baǵasyn, ishki naryqqa jetkiziletin ónim úlesin (janar-jaǵarmaı baǵasyn turaqty ustap turý maqsatynda) jáne óndirý kólemin qosa alǵanda, kompanııanyń jyldyq tabysy 1 trln teńgeden aspaıdy.
Mysaly, 2020 jyly munaı saýdasynan 477 mlrd teńge qarjy tústi, al 2022 jyly bul soma 901 mlrd teńgege jetti.
Sonymen qatar, jýrnalıst jazbasynda «Ózenmunaıgaz» shyǵyndarynyń qurylymyna qatysty jalǵan aqparat berilgen.
Mysaly, 2022 jyly «Ózenmunaıgaz» AQ uńǵymalardy burǵylaýǵa 93 mlrd teńge nemese jalpy shyǵyndarynyń shamamen 10%-yn jumsady.
Al uńǵyma jóndeýge 14 mlrd teńge nemese jalpy shyǵynnyń shamamen 1%, sorǵy-kompressorlyq qubyrlardy satyp alýǵa 21 mlrd teńge nemese jalpy shyǵynnyń shamamen 2% jumsaldy.
«Bıylǵy kórsetkishterge keler bolsaq, 4 aıdyń qorytyndysy boıynsha kompanııanyń taza paıdasy 14 mlrd teńge boldy. Bul nátıjege qaramastan, uńǵymalar qory men arnaıy tehnıka parkin, jerasty jabdyqtardy jańartýǵa baǵyttalǵan ózge de ınvestıtsııalyq shyǵyndardy eskergende, taza qarjy aǵymy mınýs 40 mlrd teńge deńgeıinde qalyptasty. Quıylǵan ınvestıtsııalar qaıyrymyn kompanııa bolashaqta kóredi dep kútilýde. Sondaı-aq, qala quraýshy negizgi kásiporyn retinde «Ózenmunaıgazǵa» joǵary áleýmettik júkteme artylǵan, kompanııa jyl saıyn óńirdegi kásiporyndardy ǵana emes, otandyq taýar óndirýshilerdi de jumyspen qamtýǵa aıryqsha mán beredi» dep habarlady QMG baspasóz qyzmeti.
Kompanııanyń operatsııalyq jáne qarjylyq jaǵdaıy týraly aqparat resmı derekkózderde jarııalanady.
