Ózenmunaıgazdyń TMD-da teńdesi joq tsehy tozyp tur

AQTAÝ. QazAqparat - «Qazmunaıgaz» UK AQ basqarma tóraǵasy Maǵzum Myrzaǵalıev Mańǵystaý oblysyna jumys sapary barysynda kompanııanyń enshiles kásiporny «Ózenmunaıgaz» AQ-nyń jerasty jabdyqtaryn jóndeý jáne dıagnostıka jasaý tsehyna bardy, dep habarlaıdy QazAqparat.

Atalǵan tseh jylyna 400 myń sorǵy-kompressor qubyrlardy, 300 myń sorǵy shtangalaryn, 10 myń shtangaly tereń sorǵylardy jóndeýge múmkindik beredi. Paıdalanýǵa berilgen 2012-2013 jyldary tsehtyń Qazaqstanda ǵana emes, TMD elderinde de balamasy bolǵan joq. Alaıda, jyldar óte kele jóndeý jabdyqtarynyń tozýyna baılanysty onyń jumys tıimdiligi tómendedi. Jóndeý brıgadalaryna qabyldaý kópirleri, preventorlar, gıdrokiltter, spaıder sekildi jabdyqtar jetispeıtini baıqalady. Munyń barlyǵy uńǵymalardyń turaqty jumysy men qaýipsizdigine áser etedi.

Osyǵan baılanysty «Jerasty jabdyqtaryn jóndeý jáne dıagnostıka jasaý tsehyn jańǵyrtý» jobasyna saı, jóndeý jabdyqtaryn jańartý josparlanyp otyr. ÓMG bas dırektory Nurdáýlet Kılybaıdyń aıtýynsha, jańǵyrtý jumysy dıagnostıka jáne jóndeý jelisiniń ónimdiligin arttyrady.

QMG basshysy tseh jumysymen tanysqannan keıin «ÓzenMunaıServıs» JShS, «Qazaq gaz óńdeý zaýyty» JShS, «KenQurylysServıs» JShS, «KMG EP» Catering» JShS, «Burǵylaý» JShS, «Kezbı» JShS sekildi Ózenmunaıgazdyń basqa da merdiger uıymdarynyń ókilderimen kezdesti. Jıynda qyzmet kórsetetin jáne jóndeý jumystarymen aınalysatyn uıymdardaǵy eńbek ujymdarynyń áleýmettik jaǵdaıy talqylandy.

Búgingi tańda Ózenmunaıgazben 30-dan astam merdiger uıym jumys isteıdi. Jalpy, kásiporyn jumysyna 20 myńnan astam adam jumyldyrylǵan.